دنیا کی قدیم ترین گھڑی
اگر دنیا کی قدیم ترین محفوظ اور آج بھی کام کرنے والی میکانکی گھڑی کی بات کی جائے تو انگلینڈ کے شہر سالسبری کے تاریخی گرجا گھر میں موجود گھڑی نمایاں مقام رکھتی ہے۔
اس کی تیاری کا زمانہ تقریباً 1386ء بتایا جاتا ہے۔ اس گھڑی میں روایتی گھڑیوں کی طرح وقت دکھانے والا ڈائل نہیں، بلکہ اس کا بنیادی مقصد گھنٹوں کی اطلاع دینے کیلئے گھنٹی بجانا تھا۔
یہ گھڑی لوہے کے مضبوط ڈھانچے اور پیچیدہ میکانکی نظام پر مشتمل ہے۔ اس کا نظام گرتے ہوئے وزن کی قوت سے چلتا تھا اور اسے روزانہ چابی دے کر دوبارہ توانائی فراہم کرنا پڑتی تھی۔ 1884ء میں اسے ایک نئی گھڑی کی تنصیب کے بعد نظرانداز کر دیا گیا، تاہم بعد میں اس کی تاریخی اہمیت سامنے آئی۔ 1956ء میں اس کی مرمت اور بحالی کی گئی اور اسے دوبارہ قابلِ استعمال بنایا گیا۔
یہ تاریخی گھڑی انسانی ذہانت، سائنسی ترقی اور وقت کی پیمائش کے سفر کی ایک قابلِ ذکر مثال ہے۔ آج جدید ڈیجیٹل اور ایٹمی گھڑیاں انتہائی درست وقت فراہم کرتی ہیں، لیکن سالسبری کی یہ قدیم گھڑی یاد دلاتی ہے کہ صدیوں پہلے بھی انسان وقت کو منظم کرنے کیلئے غیرمعمولی مہارت کا مظاہرہ کر چکا تھا۔
Comments / رائے دیں
Share your thoughts. Comments are reviewed before they appear publicly.
Approved Comments