منافقت، بدترین انسانی فعل
’’قیامت کے دن تم اللہ کے نزدیک سب سے برے لوگوں میں اس شخص کو پاؤ گے جو دو چہروں والا ہو‘‘ (صحیح بخاری) ’’اور تم میں سے کوئی دوسرے کی غیبت نہ کرے،کیا تم میں سے کوئی پسند کرے گا کہ اپنے مردہ بھائی کا گوشت کھائے؟‘‘ (سورۃ الحجرات) ’’اور تم بہت قسمیں کھانے والے ہر ذلیل شخص کی بات نہ مانو، جو عیب جو ہے، چغلی لگاتا پھرتا ہے‘‘ (سورۃ القلم )
ہم میں سے اکثر لوگ منافقت کا ذکر آتے ہی ان لوگوں کو سوچتے ہیں جو نبی کریمﷺ کے زمانے میں زبان سے ایمان کا دعویٰ کرتے اور دل میں انکار چھپائے رکھتے تھے۔ مگر منافقت کا ایک دروازہ ہمارے اپنے گھروں، خاندانوں اور دوستیوں میں بھی کھلا ہوا ہے۔ ملاقات پر گلے لگانا، تعریفوں کے پل باندھنا، خیریت پوچھنا، اور پیٹھ پھیرتے ہی اسی شخص کی برائیاں شروع کر دینا، ایسا مزاج بن چکا ہے جسے لوگ دنیاداری کہہ کر ٹال دیتے ہیں۔ اس مضمون میں قرآن و حدیث کی روشنی میں دیکھا جائے گا کہ رشتوں کی یہ دو رخی دین میں کیا حیثیت رکھتی ہے اور اس سے بچنے کا راستہ کیا ہے۔
دو چہروں والے انسان کا
بدترین لوگوں میں شمار
نبی کریمﷺ نے فرمایا: ’’قیامت کے دن تم اللہ کے نزدیک سب سے برے لوگوں میں اس شخص کو پاؤ گے جو دو چہروں والا ہو، کچھ لوگوں کے پاس ایک چہرے کے ساتھ آتا ہے اور دوسروں کے پاس دوسرے چہرے کے ساتھ‘‘ (صحیح بخاری: 7179، صحیح مسلم: 2526)۔ یہ حدیث ہماری روزمرہ زندگی کی سب سے عام بیماری پر سیدھی چوٹ ہے۔ جو شخص ایک مجلس میں ایک فریق کی ہاں میں ہاں ملائے اور دوسری مجلس میں اسی کے خلاف بولے، وہ اس وعید کا مصداق بن سکتا ہے۔ خاندانی جھگڑوں میں یہ کردار اکثر نظر آتا ہے: ساس کے پاس بہو کی برائی، بہو کے پاس ساس کی شکایت، اور خود دونوں کا خیرخواہ بنا رہنا۔
زبان پر ایمان، تنہائی میں کچھ اور
قرآن نے منافقین کا یہ رویہ بیان کیا ہے: ’’اور جب وہ ایمان والوں سے ملتے ہیں تو کہتے ہیں ہم ایمان لائے، اور جب اپنے شیطانوں کے ساتھ تنہا ہوتے ہیں تو کہتے ہیں ہم تو تمہارے ساتھ ہیں، ہم تو محض مذاق کرتے ہیں‘‘(سورۃ البقرہ :14)۔ اس آیت میں رویے کا ڈھانچہ نظر آتا ہے، سامنے ایک بات، پیچھے دوسری۔ آج اگرچہ معاملہ ایمان کے اعلان کا نہیں ہوتا، مگر مزاج وہی ہے۔ آدمی منہ پر کہتا ہے ’’آپ تو بہت اچھے ہیں‘‘، اور بعد میں دوستوں کی محفل میں اسی کا مذاق اڑاتا ہے۔ جب ظاہر اور باطن میں اتنا فاصلہ پیدا ہو جائے تو یہ اس بنیادی بیماری کی طرف بڑھنے کا اشارہ ہے جس کا نام قرآن نے نفاق رکھا ہے۔
غیبت کی حقیقت اور اس کا قرآنی منظر
قرآن مجید نے غیبت کو ایک ایسی تصویر میں پیش کیا ہے جس سے طبیعت گھن کھاتی ہے: ’’اور تم میں سے کوئی دوسرے کی غیبت نہ کرے۔ کیا تم میں سے کوئی پسند کرے گا کہ اپنے مردہ بھائی کا گوشت کھائے؟ تم اسے ناپسند کرتے ہو۔ اور اللہ سے ڈرو، بے شک اللہ توبہ قبول کرنے والا، رحم کرنے والا ہے‘‘ (سورۃ الحجرات: 12)۔ نبی کریمﷺ نے غیبت کی تعریف خود بیان فرمائی، آپﷺ نے پوچھا کہ کیا تم جانتے ہو غیبت کیا ہے؟ صحابہ کرام ؓنے عرض کیا کہ اللہ اور اس کا رسولﷺ بہتر جانتے ہیں۔ فرمایا: ’’تمہارا اپنے بھائی کا ذکر ایسی بات سے کرنا جو اسے ناپسند ہو‘‘۔ عرض کیا گیا کہ اگر وہ بات واقعی اس میں موجود ہو؟ فرمایا: ’’اگر وہ بات اس میں موجود ہے تو تم نے اس کی غیبت کی، اور اگر موجود نہیں تو تم نے اس پر بہتان لگایا‘‘(صحیح مسلم: 2589)
چغلی: رشتوں میں آگ لگانے والا عمل
چغلی یہ ہے کہ ایک کی بات دوسرے تک پہنچائی جائے تاکہ دونوں کے درمیان بگاڑ پیدا ہو۔ نبی کریمﷺ نے فرمایا: ’’چغل خور جنت میں داخل نہیں ہوگا‘‘ (صحیح بخاری: 6056، صحیح مسلم: 105)۔ ایک موقع پر نبی کریم ﷺ دو قبروں کے پاس سے گزرے اور فرمایا کہ ان دونوں کو عذاب دیا جا رہا ہے، اور کسی بڑی بات پر نہیں، ان میں سے ایک پیشاب سے احتیاط نہیں کرتا تھا اور دوسرا چغلی کھاتا پھرتا تھا (صحیح بخاری: 216، صحیح مسلم: 292)۔ قرآن نے بھی ایسے شخص کی صفت بیان کی ہے جس کی اطاعت نہیں کرنی چاہیے: ’’اور تم ہر بہت قسمیں کھانے والے ذلیل شخص کی بات نہ مانو، جو عیب جو ہے، چغلی لگاتا پھرتا ہے‘‘ (سورۃ القلم :10،11)
جو کہتے ہیں وہ کرتے کیوں نہیں؟
رشتوں میں منافقت کا ایک پہلو وعدوں اور دعوؤں کا ہے۔ آپ کیلئے جان حاضر ہے کہنے والا ضرورت کے وقت غائب ہو جاتا ہے۔ قرآن نے اس پر سخت تنبیہ کی ہے: ’’اے ایمان والو! تم وہ بات کیوں کہتے ہو جو کرتے نہیں؟ اللہ کے نزدیک یہ بات بڑی ناراضی کا سبب ہے کہ تم وہ کہو جو نہ کرو‘‘(سورۃ الصف :2،3)۔
نبی کریمﷺ نے منافق کی تین علامات بتائیں: جب بات کرے تو جھوٹ بولے، جب وعدہ کرے تو خلاف ورزی کرے، اور جب امانت دی جائے تو خیانت کرے (صحیح بخاری:33، صحیح مسلم: 59)۔ ایک اور روایت میں چار خصلتیں آئی ہیں، جس میں ان میں سے کوئی ایک پائی جائے اس میں نفاق کی ایک خصلت موجود ہے۔ ان میں جھگڑے کے وقت بدزبانی اور عہد توڑنا بھی شامل ہے۔ (صحیح بخاری: 34، صحیح مسلم:58)
میٹھی باتیں اور اندر کا فساد
قرآن نے ایک ایسے شخص کا نقشہ کھینچا ہے جس کی باتیں دنیا کے معاملات میں آپ کو بھلی لگتی ہیں: ’’اور لوگوں میں کوئی ایسا بھی ہے جس کی دنیاوی زندگی کی بات تمہیں اچھی لگتی ہے اور وہ اپنے دل کی بات پر اللہ کو گواہ بناتا ہے، حالانکہ وہ سخت ترین جھگڑالو ہے۔ اور جب وہ لوٹتا ہے تو زمین میں فساد پھیلانے کی کوشش کرتا ہے‘‘ (سورۃ البقرہ: 204،205)۔ رشتوں میں اس کی صورت یہ ہے کہ آدمی سامنے شیریں بیان اور ہمدرد بنا رہتا ہے، مگر پیچھے لگائی بجھائی اور سازشوں سے تعلقات خراب کرتا ہے۔ قرآن کی یہ بات یاد رکھنے کی ہے کہ میٹھے بول ہمیشہ اچھی نیت کی دلیل نہیں ہوتے۔ آدمی کے اصل کردار کا پتا اس سے چلتا ہے کہ وہ غیر موجودگی میں کیا کہتا ہے۔
چھپ کر کرنے والے اللہ
سے نہیں چھپ سکتے
منافقانہ رویہ اس بھروسے پر پلتا ہے کہ پیچھے کی باتیں کسی کو معلوم نہیں ہوں گی۔ قرآن اس خیال کو توڑتا ہے: ’’وہ لوگوں سے چھپتے ہیں اور اللہ سے نہیں چھپتے، حالانکہ وہ اس وقت بھی ان کے ساتھ ہوتا ہے جب وہ رات کو ایسی بات کی سازش کرتے ہیں جس سے وہ راضی نہیں‘‘ ( النساء:108) اور فرمایا: ’’انسان کوئی بات منہ سے نہیں نکالتا مگر اس کے پاس ایک نگران تیار موجود ہوتا ہے‘‘( ق :18)۔ نبی کریم ﷺ نے فرمایا: ’’بندہ بعض اوقات ایک بات بغیر سوچے سمجھے کہہ دیتا ہے جس کی وجہ سے وہ جہنم میں مشرق اور مغرب کے درمیان کے فاصلے سے بھی زیادہ دور جا گرتا ہے‘‘ (صحیح بخاری: 6477، صحیح مسلم: 2988)
بدگمانی، ٹوہ اور عیب جوئی
غیبت اور چغلی کی جڑ اکثر بدگمانی اور دوسروں کی ٹوہ میں لگے رہنے میں ہوتی ہے۔ قرآن نے ان سب کو ایک ہی آیت میں جمع کیا ہے: ’’اے ایمان والو! بہت سی بدگمانیوں سے بچو، بیشک بعض بدگمانیاں گناہ ہیں، اور جاسوسی نہ کرو‘‘ (الحجرات:12)۔ نبی کریمﷺ نے فرمایا: ’’بدگمانی سے بچو، کیونکہ بدگمانی سب سے جھوٹی بات ہے۔ نہ کسی کے عیب ٹٹولو، نہ جاسوسی کرو، نہ حسد کرو، نہ ایک دوسرے سے منہ پھیرو، نہ بغض رکھو، اور اللہ کے بندے بھائی بھائی بن جاؤ‘‘ (صحیح بخاری:6064، صحیح مسلم: 2563)۔ جو دل میں دوسروں کے بارے میں برے گمان پالتا ہے، وہ سامنے مسکراتا اور پیچھے برائی کرتا ہے۔ دل کی اصلاح ہی زبان کی اصلاح کا راستہ ہے۔
ایمان والوں کی صفت
اسلام نے رشتوں کی بنیاد خیرخواہی اورمحبت پر رکھی ہے۔ نبی کریمﷺ نے فرمایا: ’’تم میں سے کوئی اس وقت تک مومن نہیں ہو سکتا جب تک اپنے بھائی کیلئے وہی پسند نہ کرے جو اپنے لیے پسند کرتا ہے‘‘ (صحیح بخاری: 13، صحیح مسلم: 45) اور فرمایا: ’’مسلمان مسلمان کا بھائی ہے، نہ اس پر ظلم کرتا ہے اور نہ اسے بے یار و مددگار چھوڑتا ہے۔ جو شخص اپنے بھائی کی ضرورت پوری کرنے میں لگا ہو، اللہ اس کی ضرورت پوری کرتا ہے، اور جو کسی مسلمان کی پردہ پوشی کرے، اللہ قیامت کے دن اس کی پردہ پوشی فرمائے گا‘‘(صحیح بخاری: 2442، صحیح مسلم: 2580)۔ دوسروں کے عیب اچھالنے کے بجائے چھپانا اور صلح کرانا ایمان کی علامت ہے۔
علاج: سچ، خیر یا خاموشی
اس بیماری کا سب سے مختصر اور جامع علاج نبی کریمﷺ نے بتا دیا: ’’جو شخص اللہ اور آخرت کے دن پر ایمان رکھتا ہے وہ اچھی بات کہے یا خاموش رہے‘‘ (صحیح بخاری: 6018، صحیح مسلم: 47)۔نبی کریم ﷺ نے زبان اور شرمگاہ کی حفاظت کی ضمانت پر جنت کی ضمانت دی۔ (صحیح بخاری:6474)۔ سچائی کے بارے میں فرمایا کہ سچ نیکی کی طرف رہنمائی کرتا ہے اور نیکی جنت کی طرف (صحیح بخاری: 6094)۔
چند باتیں مفید ہیں
٭…جس کے بارے میں بات کر رہے ہوں، خود سے پوچھیں: کیا میں یہ بات اس کے منہ پر کہہ سکتا ہوں؟
٭…اگر کسی سے شکایت ہو تو اسی سے سیدھی اور نرمی سے بات کریں، تیسرے فرد کے سامنے نہیں۔
٭…مجلس میں کسی کی غیبت شروع ہو تو موضوع بدل دیں یا اٹھ جائیں۔
٭…اگر غیبت ہو جائے تو سچی توبہ کریں اور جس کی کی ہے اس کے حق میں دعا اور اچھی بات کریں۔
٭…خیرخواہی کا طریقہ اپنائیں، کیونکہ دین نام ہی خیرخواہی کا ہے (صحیح مسلم:55)۔
رشتوں کی اصل خوبصورتی دکھاوے میں نہیں، اس میں ہے کہ آدمی غیر موجودگی میں بھی اسی طرح عزت کرے جیسے سامنے کرتا ہے۔ قرآن اور حدیث کی یہ تعلیمات ہمیں بتاتی ہیں کہ زبان کی یہ لغزشیں معمولی نہیں، بلکہ نفاق کی طرف لے جانے والی راہیں ہیں۔ اللہ تعالیٰ ہمیں ظاہر و باطن کی یکسانیت اور زبان کی حفاظت نصیب فرمائے۔ امین
Comments / رائے دیں
Share your thoughts. Comments are reviewed before they appear publicly.
Approved Comments