جدید دنیا میں جہاں مصنوعی ذہانت، روبوٹکس اور جدید دفاعی ٹیکنالوجی برق رفتاری سے ترقی کر رہی ہے، وہیں قدرتی آفات، جنگوں، دہشت گردی اور عالمی عدم استحکام کے خدشات نے انسان کو اپنی بقا کے نئے طریقے تلاش کرنے پر بھی مجبور کر دیا ہے۔ اسی تناظر میں ایک ایسا جدید اور مستقبل کا تصور پیش کرنے والا ''موبائل لائف پوڈ‘‘ متعارف کرایا گیا ہے جو ہنگامی حالات میں ایک محفوظ پناہ گاہ کا کردار ادا کر سکتا ہے۔ تقریباً 35 ہزار پاؤنڈ مالیت کا یہ جدید حفاظتی کیپسول گولیوں، دھماکوں اور دیگر جان لیوا خطرات سے تحفظ فراہم کرنے کیلئے تیار کیا گیا ہے۔ ماہرین کے مطابق یہ صرف ایک عارضی پناہ گاہ نہیں بلکہ ایسی ٹیکنالوجی کی مثال ہے جو مستقبل میں شہری دفاع، ہنگامی امداد اور قدرتی آفات سے بچاؤ کے نظام کا اہم حصہ بن سکتی ہے۔ اگرچہ اس کی افادیت اور قیمت پر مختلف آراء پائی جاتی ہیں، تاہم اس ایجاد نے یہ سوال ضرور پیدا کر دیا ہے کہ کیا آنے والے دور میں ذاتی حفاظتی پناہ گاہیں بھی روزمرہ زندگی کی ضرورت بن جائیں گی؟فرانس میں قائم ٹیکنالوجی کمپنی مومنٹم ٹیکنالوجیز نے ایک ایسا جدید حفاظتی شیلٹر متعارف کرایا ہے جو گولیوں سے لے کر بم دھماکوں تک مختلف خطرات سے تحفظ فراہم کرنے کی صلاحیت رکھتا ہے۔ ''لائف پوڈ‘‘ نامی یہ کیپسول انتہائی مضبوط اور جدید تکنیکی فولاد (ہائی اسٹرینتھ ٹیکنیکل اسٹیل) سے تیار کیا گیا ہے، تاہم اسے مکمل طور پر متحرک (موبائل) رکھنے کیلئے ڈیزائن کیا گیا ہے تاکہ ضرورت پڑنے پر آسانی سے ایک جگہ سے دوسری جگہ منتقل کیا جا سکے۔کمپنی کے مطابق ''روایتی حفاظتی ڈھانچوں کے برعکس، جو عموماً ایک ہی مقام پر مستقل نصب ہوتے ہیں اور صرف ایک مخصوص خطرے سے تحفظ فراہم کرتے ہیں، لائف پوڈ کیپسولز کو اس انداز میں تیار کیا گیا ہے کہ انہیں آسانی سے منتقل، صنعتی پیمانے پر تیار، فوری طور پر نصب اور مختلف عملی حالات کے مطابق استعمال کیا جا سکے۔ان کیپسولز کو کنٹینرز کے ذریعے منتقل کیا جا سکتا ہے، ہیلی کاپٹر کے ذریعے ایک جگہ سے دوسری جگہ پہنچایا جا سکتا ہے، انہیں ایک دوسرے کے اوپر رکھا جا سکتا ہے، اور شہری علاقوں، صنعتی تنصیبات یا دور دراز مقامات پر بھی باآسانی نصب کیا جا سکتا ہے۔البتہ اس جدید حفاظتی ٹیکنالوجی کی قیمت بھی خاصی زیادہ ہے۔لائف پوڈ کے بنیادی کیپسول کی قیمت 25,404 سے 34,904 برطانوی پاؤنڈ (تقریباً 96 لاکھ سے ایک کروڑ 32 لاکھ پاکستانی روپے) کے درمیان رکھی گئی ہے، جبکہ یہ قیمت صرف کیپسول کی ہے اور اس میں اضافی سہولیات شامل نہیں ہیں۔لائف پوڈ تین مختلف ماڈلز میں دستیاب ہے، جنہیں کیپسول W01، کیپسول B01 اور کیپسول Q01 کا نام دیا گیا ہے۔کیپسول W01 ایک تیرنے والا (Floating) حفاظتی کیپسول ہے، جسے دو سے چار افراد کیلئے خاص طور پر سونامی، اچانک آنے والے سیلاب، ساحلی علاقوں میں طغیانی، ڈیم یا پشتوں کے ٹوٹنے جیسے شدید قدرتی حالات میں استعمال کیلئے تیار کیا گیا ہے۔کمپنی کے مطابق ''اس کا 5083 میرین گریڈ ایلومینیم سے تیار کردہ ڈھانچہ، تیرنے کا نظام، مربوط بیلسٹ (وزن متوازن رکھنے کا نظام) اور اندرونی حفاظتی سہولیات کسی خاندان یا چھوٹے گروہ کو عارضی طور پر محفوظ پناہ فراہم کرتی ہیں۔یہ کیپسول پانی پر تیرنے، بہتے ہوئے ملبے کے ٹکراؤ کو برداشت کرنے اور اپنے اندر موجود افراد کو اس وقت تک محفوظ رکھنے کیلئے ڈیزائن کیا گیا ہے جب تک امدادی ٹیمیں نہ پہنچ جائیں۔ اس کے ڈیزائنرز کا کہنا ہے کہ W01 پر کیے گئے ابتدائی تجربات کے نتائج انتہائی حوصلہ افزا رہے ہیں، تاہم اسے مارکیٹ میں کب متعارف کرایا جائے گا، اس بارے میں ابھی کوئی حتمی اعلان نہیں کیا گیا۔کیپسول B01 ایک سے دو افراد کیلئے تیار کیا گیا ہے، جس کا مقصد جنگی یا انتہائی خطرناک ماحول میں محفوظ پناہ فراہم کرنا ہے۔ مومنٹم ٹیکنالوجیز کے مطابق ''B01‘‘ کو گولیوں، دھاتی ریزوں (شریپنل)، مسلح حملوں اور شدید خطرناک ماحول سے تحفظ فراہم کرنے کیلئے ڈیزائن کیا گیا ہے۔یہ ماڈل حساس مقامات، اہم قومی تنصیبات، سکیورٹی فورسز، صنعتی اداروں اور ایسی تنظیموں کیلئے موزوں ہے جنہیں فوری، مختصر حجم اور پہلے سے تعینات کیے جا سکنے والے حفاظتی حل کی ضرورت ہو۔کمپنی کے مطابق اس کیپسول میں موجود افراد چند ہی سیکنڈز میں اس کے اندر پناہ لے کر حفاظتی نظام کو لاک کر سکتے ہیں، جس سے ہنگامی حالات میں فوری تحفظ ممکن ہو جاتا ہے۔ کیپسول B01 اس وقت تیاری کے مرحلے میں ہے، جبکہ اس کی حتمی جانچ اور منظوری اسی ماہ مکمل ہونے کی توقع ہے۔ کیپسول Q01 کو خاص طور پر زلزلوں، عمارتوں کے منہدم ہونے اور تعمیراتی عدم استحکام سے پیدا ہونے والی آفات کا مقابلہ کرنے کیلئے تیار کیا گیا ہے۔مومنٹم ٹیکنالوجیز کے مطابق ''Q01‘‘ ایسے علاقوں کیلئے تیار کیا گیا ہے جہاں زلزلوں اور اچانک عمارتیں گرنے کے خطرات زیادہ ہوں۔اس کا بنیادی مقصد ایک ایسی مختصر، آسانی سے قابلِ رسائی اور مضبوط محفوظ پناہ گاہ فراہم کرنا ہے، جو اس وقت زندہ بچنے کے امکانات میں اضافہ کرے جب کسی عمارت سے فوری انخلا ممکن نہ رہے۔یہ جدید حفاظتی لائف پوڈز پیرس میں منعقد ہونے والی معروف ٹیکنالوجی نمائش ویوا ٹیک میں متعارف کرائے گئے، جہاں مومنٹم ٹیکنالوجیز کے بانی سیڈرک شوفا نے مستقبل کے تحفظ اور ہنگامی حالات سے نمٹنے کے حوالے سے اپنے وژن سے بھی آگاہ کیا۔
