تربیتی کیمپوں میں شریک ویمن کرکٹرز کے یومیہ الاؤنسز بند کرنے کا فیصلہ
لاہور: (ویب ڈیسک) پاکستان کرکٹ بورڈ (پی سی بی) نے جنوبی افریقہ کیخلاف سیریز سے قبل ویمنز ٹیم کی پلیئرز کو بڑا دھچکا دیدیا۔
پی سی بی نے قومی تربیتی کیمپوں میں شرکت کرنے والی کرکٹرز کے یومیہ الاؤنسز بند کرنے کا فیصلہ کر لیا جس سے پلیئرز میں مایوسی پھیل گئی ہے۔
بورڈ کی جانب سے سیریز سے محض ایک روز قبل کیے گئے اس فیصلے سے ویمن کرکٹرز کی کارکردگی پر اثر انداز ہونے کا امکان ہے۔
پی سی بی کے عہدیدار نے فیصلے کا دفاع کرتے ہوئے کہا کہ کھلاڑیوں کو روزانہ الاؤنس نہیں دیا جا رہا کیونکہ بورڈ اب انہیں رہائش اور دن میں تین وقت کا کھانا فراہم کر رہا ہے۔
دوسری جانب دلچسپ بات یہ ہے کہ پاکستانی مینز ٹیم کے کھلاڑیوں کو رہائش اور یومیہ الاؤنس کے ساتھ روزانہ 2 وقت کا کھانا بھی فراہم کیا جاتا ہے۔
واضح رہے کہ جنوبی افریقا کے خلاف 17 ستمبر سے سیریز شروع ہونے کے بعد خواتین کرکٹرز کو یومیہ الاؤنس ملے گا۔
