ٹائم میگزین نے گلوکارہ ٹیلر سوئفٹ کو 2023ء کی بہترین شخصیت قرار دے دیا

نیویارک: (ویب ڈیسک) معروف ٹائم میگزین نے امریکا کی گلوکارہ ٹیلر سوئفٹ کو 2023ء کی بہترین شخصیت قرار دے دیا ہے۔

گلوکارہ ٹیلر سوئفٹ کیلئے 2023ء کا سال بہت زیادہ کامیاب ثابت ہوا، 33 سالہ گلوکارہ کے Eras ورلڈ ٹور نے کامیابی کے تمام ریکارڈ توڑ دیے تھے جس کے نتیجے میں وہ ارب پتی بن گئیں۔

1927 سے ہر سال باقاعدگی سے بہترین شخصیت کا انتخاب کرنے والے معروف امریکی جریدے ٹائم میگزین کے آفیشل ایکس اکاؤنٹ پر جریدے کا سرورق پوسٹ کیا گیا جس میں گلوکارہ ٹیلر سوئفٹ کی تصویر ہے اور انہیں سال کی بہترین شخصیت قرار دیا گیا ہے۔

جریدے سے بات کرتے ہوئے گلوکارہ ٹیلر سوئفٹ کا کہنا ہے کہ مجھے بہت زیادہ خوشی اور فخر محسوس ہو رہا ہے، میں خود کو تخلیقی طور پر زیادہ آزاد اور مکمل تصور کر رہی ہوں۔

ٹائم میگزین نے پرسن آف دی ائیر کیلئے باربی، برطانیہ کے بادشاہ چارلس سوئم، ڈونلڈ ٹرمپ کے پراسیکیوٹرز اور دیگر کو شارٹ لسٹ کیا تھا مگر یہ اعزاز ٹیلر سوئفٹ کے حصے میں آیا۔

اس سے قبل پیپل میگزین نے بھی ٹیلر سوئفٹ کو اسی طرح کے اعزاز سے نوازا تھا جبکہ فوربز نے انہیں میڈیا اور انٹرٹینمنٹ کی طاقتور ترین خاتون قرار دیا تھا۔ 

Advertisement
روزنامہ دنیا ایپ انسٹال کریں