ہالی وڈ سٹار ول سمتھ پر جنسی ہراسانی کا مقدمہ
ہالی وڈ: (ویب ڈیسک) ہالی وڈ سٹار ول سمتھ پر انہی کے وائلن نواز نے جنسی ہراسانی اور غلط طریقے سے ملازمت سے برطرف کرنے کا الزام لگا دیا۔
امریکی میڈیا کے مطابق موسیقار برائن کنگ جوزف نے دائر کیے گئے مقدمے میں امریکی گلوکار و اداکار 57 سالہ سمتھ اور ٹرائبُل سٹوڈیو کی انتظامیہ کو فریق نامزد کیا ہے جس میں جنسی ہراسانی کا باضابطہ الزام لگایا گیا ہے۔
سمتھ کے وکیل نے ان الزامات کی تردید کرتے ہوئے بتایا کہ جوزف کے میرے مؤکل کے بارے میں الزامات غلط، بے بنیاد اور غیر ذمہ دارانہ ہیں، ان کی مکمل طور پر تردید کی جاتی ہے اور ہم ان دعوؤں سے نمٹنے اور سچ سامنے لانے کے لیے تمام قانونی راستے استعمال کریں گے۔
مقدمے میں 33 سالہ جوزف نے الزام لگایا کہ سمتھ نے اپنی ’’بیسڈ آن اے ٹرو سٹوری‘‘ ٹور کے دوران بطور بینڈ ممبر ان کے ساتھ شکاری رویہ اختیار کیا، سمتھ نے انہیں اس وقت مزید جنسی استحصال کے لیے ’تیار کرنے اور ذہنی طور پر قابو کرنے کی کوشش کی جب وہ پہلی بار نومبر 2024 میں سان ڈیاگو کے ایک شو میں پرفارم کرنے کے لیے ہائر کیے گئے۔
بعد ازاں انہیں سمتھ کے 2025 ٹور میں شامل ہونے اور اُن کے 20 سال بعد ریلیز ہونے والے پہلے البم بیسڈ آن اے ٹرو سٹوری پر کام کرنے کی دعوت دی گئی، جو مارچ میں ریلیز ہوا، سمتھ نے انہیں بتایا کہ ہمارا آپس میں اتنا خاص تعلق ہے جو کسی اور کے ساتھ نہیں۔
2018 میں امریکہ گاٹ ٹیلنٹ کے سابق مقابل امیدوار رہنے والے جوزف نے مارچ 2025 میں لاس ویگاس میں ٹور کے پہلے شو میں شرکت کی، جہاں بینڈ اور عملے کے لیے ہوٹل کے کمرے بک تھے۔
جوزف کا کہنا ہے کہ جب وہ اپنے کمرے میں واپس آئے تو وہاں کوئی غیر قانونی طور پر داخل ہوا تھا، انہیں کمرے میں ایک بیئر کی بوتل، وائپس، کسی اور کے نام پر HIV کی دوا کی بوتل، ایک سرخ بیگ، ایک بالی اور کسی اور شخص کے ہسپتال سے ڈسچارج پیپر ملے۔
ان کے مطابق وہاں ایک نوٹ بھی موجود تھا جس پر لکھا تھا کہ برائن، میں 5:30 سے زیادہ دیر تک نہیں آؤں گا، صرف ہم دونوں، سٹون ایف، وہ سمجھ گئے کہ کوئی نامعلوم شخص جلد ہی ان کے کمرے میں واپس آ کر ان کے ساتھ جنسی عمل کرنے والا ہے۔
یہ واقعہ ہوٹل سکیورٹی اور سمتھ کی ٹور مینیجمنٹ کو رپورٹ کرنے کے بعد وہ کہتے ہیں کہ انہیں جھوٹا قرار دیا گیا اور شرمندہ کیا گیا، چند روز بعد انہیں یہ بتا کر برطرف کر دیا گیا کہ ٹور کسی اور سمت میں جا رہا ہے، لیکن بعد ازاں ایک اور وائلن نواز کو ان کی جگہ بک کر لیا گیا۔
مقدمے کے مطابق برطرفی کے نتیجے میں جوزف کو پی ٹی ایس ڈی اور مالی نقصان کا سامنا کرنا پڑا، وہ بدلے کی کارروائی ، غلط برطرفی اور جنسی ہراسانی پر ہرجانے کا مطالبہ کر رہے ہیں، جن کا تعین جیوری کرے گی۔
