غزہ کے 90 فیصد بچوں کو پولیو ویکسین کی پہلی خوراک دے دی گئی
غزہ: (ویب ڈیسک) غزہ کے 90 فیصد بچوں کو پولیو ویکسین کی پہلی خوراک دیدی گئی۔
فلسطینی پناہ گزینوں کے لئے اقوام متحدہ کی ریلیف اینڈ ورکس ایجنسی (UNRWA) کے کمشنر جنرل فلپ لازارینی نے کہا ہے کہ غزہ کی پٹی میں پولیو کے قطرے پلانے کی مہم کی کوریج 90 فیصد تک پہنچ گئی ہے۔
انہوں نے مزید بتایا کہ اگلا قدم یہ یقینی بنانا ہے کہ اس مہینے کے آخر تک سینکڑوں، ہزاروں بچوں کو دوسری خوراک مل جائے، غزہ کی پٹی میں دس سال سے کم عمر کے تقریباً 6 لاکھ 40 ہزار بچوں کو قطرے پلانے کی مہم نے اسرائیل اور حماس کے درمیان جنگ کی وجہ سے انروا اور اس کے شراکت داروں کے لیے ایک بڑا چیلنج پیش کیا۔
واضح رہے غزہ میں انسداد پولیو مہم یکم ستمبر کو شروع کی گئی تھی، یہ مہم عالمی ادارہ صحت کی جانب سے گزشتہ ماہ اس بات کی تصدیق کے بعد سامنے آئی کہ غزہ میں پولیو وائرس ٹائپ ٹو کی وجہ سے ایک بچہ جزوی طور پر مفلوج ہو گیا تھا۔
واضح رہے کہ اس ماہ 10 ستمبر کو شمالی غزہ کی پٹی میں باقی دو لاکھ بچوں کو قطرے پلانے کی مہم شروع ہونے سے قبل وسطی اور جنوبی غزہ کی پٹی میں 4 لاکھ 46 ہزار سے زیادہ فلسطینی بچوں کی ویکسی نیشن کردی گئی ہے۔
