پی او آر کارڈ ہولڈرز افغان شہریوں کو انخلا کیلئے یکم ستمبر کی حتمی ڈیڈ لائن
اسلام آباد: (دنیا نیوز) پاکستان میں مقیم پی او آر (Proof of Registration) کارڈ رکھنے والے افغان شہریوں کیلئے ملک چھوڑنے کی حتمی تاریخ یکم ستمبر 2025 مقرر کر دی گئی ہے۔
حکومتی فیصلے کے تحت پی او آر کارڈ ہولڈرز افغان شہریوں کے انخلا میں اب صرف 26 دن باقی رہ گئے۔
حکومت کی جانب سے اعلان کیا گیا ہے کہ غیر قانونی طور پر پاکستان میں مقیم افراد اور کارڈ ہولڈر افغان شہریوں کو اپنے ممالک واپس جانا ہوگا۔
اس سلسلے میں واضح کیا گیا کہ انخلا کے عمل کے دوران کسی کے ساتھ بدسلوکی نہیں کی جائے گی اور واپس جانے والوں کے لئے خوراک اور صحت کی سہولیات کے انتظامات مکمل کر لئے گئے ہیں۔
اس فیصلے کا مقصد ملک میں غیر قانونی تارکینِ وطن کے مسئلے کو حل کرنا اور قانونی طور پر رہائش کو یقینی بنانا ہے۔
حکام نے متعلقہ افراد سے اپیل کی ہے کہ وہ مقررہ مدت کے اندر اندر اپنی واپسی کے انتظامات مکمل کریں تاکہ کسی ناخوشگوار صورتحال سے بچا جا سکے۔
