آئی سی سی ورلڈ کپ 2023:دنیائے کرکٹ کا حکمران کون؟
آئی سی سی مینز کرکٹ ورلڈکپ 2023ء کا فائنل آج آسٹریلیا اور بھارت کے درمیان احمد آباد (بھارت)کے نریندر مودی کرکٹ سٹیڈیم میں کھیلا جائے گا۔دونوں ٹیمیں بھرپور فارم میں ہیں اورامید ہے آج ایک اچھا میچ دیکھنے کو ملے گا۔
آسٹریلوی ٹیم آج آٹھویں بار ورلڈکپ کافائنل کھیل رہی ہے اور اس سے قبل پانچ بار ورلڈچیمپئن بن چکی ہے جبکہ دو بار کی ورلڈ چیمپئن میزبان بھارتی ٹیم آج چوتھی مرتبہ عالمی کپ کافائنل کھیلے گی۔فائنل کیلئے تیار کی گئی پچ کے حوالے سے کہا جارہاہے کہ یہ پچ سلو ہوگی ۔بھارت نے سیمی فائنل میں نیوزی لینڈ کو جبکہ آسٹریلیا نے جنوبی افریقہ کو شکست دی۔ ممبئی کے وانکھیڈے سٹیڈیم میں کھیلے گئے ورلڈ کپ 2023 ء کے پہلے سیمی فائنل میچ میں بھارت کے کپتان روہت شرما نے ٹاس جیت کر پہلے بیٹنگ کا فیصلہ کیا اور مقررہ 50 اوورز میں 4 وکٹوں کے نقصان پر 397 رنز بنائے۔398 رنز کے ہدف کے تعاقب میں نیوزی لینڈ کی پوری ٹیم 48.5 اوورز میں 327 رنز بناکر پویلین لوٹ گئی۔ ڈیرل مچل نے 134 رنز کی نمایاں اننگز کھیلی۔بھارت بائولرشامی نے 7 کھلاڑیوں کو پویلین کی راہ دکھائی۔
دوسرے سیمی فائنل میں آسٹریلیا نے دلچسپ مقابلے کے بعد جنوبی افریقہ کو شکست دے کر فائنل کیلئے کوالیفائی کیا۔کولکتہ کے ایڈن گارڈنز میں کھیلے جانے والے ایونٹ کے دوسرے سیمی فائنل میں آسٹریلیا نے جنوبی افریقہ کا 213 رنز کا ہدف 7 وکٹوں پر حاصل کیا۔ جنوبی افریقہ نے ٹاس جیت کر پہلے بیٹنگ کرنے کا فیصلہ کیا۔ جنوبی افریقی ٹیم 50ویں اوور میں 212 رنز بنا کر آل آئوٹ ہوئی۔ آسٹریلیا کی جانب پیٹ کمنز اور مچل اسٹارک نے 3، 3 جبکہ ٹریوس ہیڈ اور جوش ہیزل ووڈ نے دو دو کھلاڑیوں کو آئوٹ کیا۔آسٹریلوی ٹیم نے ہدف عبور کرکے آٹھویں مرتبہ ورلڈکپ فائنل میں رسائی حاصل کی۔ آسٹریلیا کے ٹریوس ہیڈ کو آل رائونڈ پرفارمنس پر میچ کا بہترین کھلاڑی قرار دیا گیا۔
ورلڈ کپ 2023ء میں میزبان انڈیا کی جانب سے اپنی ٹیم کو جتوانے کیلئے مختلف حربے آزمائے جارہے ہیں جن پر مختلف ٹیموں، شائقین اور ماہرین کی جانب سے انگلیاں بھی اٹھائی گئی ہیں۔نیوزی لینڈ کے خلاف ہونے والے پہلے سیمی فائنل میں میزبان بھارت پر پچ تبدیل کرنے کا الزام عائد کر دیا گیا۔برطانوی میڈیا کا نیوزی لینڈ اور بھارت کے درمیان ہونے والے سیمی فائنل کی پچ تبدیل کرنے کا الزام عائد کرتے ہوئے کہنا ہے کہ بی سی سی آئی نے آئی سی سی کی اجازت کے بغیر سیمی فائنل میچ کی پچ تبدیل کی۔بھارتی بورڈ نے ورلڈ کپ میں دو بار استعمال ہونے والی پچ کو ایک بار پھر استعمال کرنے کا فیصلہ کیا، بھارت نے اس پچ کا انتخاب کیا جو سپنرز کیلئے سازگار تھی۔ ممبئی کے وانکھیڈے سٹیڈیم میں سیمی فائنل کیلئے پچ نمبر 7 استعمال ہونی تھی جو کہ پہلے استعمال نہیں ہوئی۔ ورلڈ کپ کے دوران پچز اور میچ شیڈول کی نگرانی کرنے والے آئی سی سی عہدیدار اینڈی ایٹکنسن نے پہلے بھی سیمی فائنل کی پچ تبدیل ہونے کی تصدیق کی ہے تاہم انہوں نے اس کی وجوہات بتانے سے گریز کیا۔
آئی سی سی عہدیدار کی اپنے متعلقہ افسران کو بھیجی گئی ای میل میں کہا گیا کہ ٹورنامنٹ کا پہلا میچ جو انگلینڈ اور نیوزی لینڈ کے درمیان شیڈول تھا وہ شیڈول کے مطابق ہوا تاہم اس کے بعد ہونے والے تین میچز کے شیڈول بغیر پیشگی اطلاع اور وضاحت کے تبدیل کیے گئے۔ رپورٹ میں کہا گیا کہ 14 اکتوبر کو احمد آباد کے نریندر مودی سٹیڈیم میں پاکستان اور بھارت کے درمیان ہونے والے میچ کی وکٹ بھی تبدیل کی گئی تھی۔ ایونٹ منیجر کے مطابق پاکستان اور بھارت کے درمیان میچ پچ نمبر 7 پر کھیلا جانا تھا تاہم یہ میچ پچ نمبر 5 پر کھیلا گیا۔اینڈی ایٹکنسن نے خبردار کیا کہ ایسے اقدامات کی وجہ سے یہ تصور کیا جائے گا کہ کرکٹ ورلڈ کپ 2023ء کا فائنل آئی سی سی کا پہلا میچ ہو گا جس کی پچ خاص طور پر میزبان بورڈ کی خواہش پر منتخب کی جائے گی یا مقابلہ کرنے والی ٹیم کو فیور دئیے بغیر تیار کی جائے گی۔دوسری جانب آئی سی سی نے سیمی فائنل میں پچ کی تبدیلی پر کہا ہے کہ ورلڈ کپ طویل ایونٹ ہے اور پچ کی تبدیلی معمول کی بات ہے۔ ایونٹ میں پچ کی تبدیلی پہلے بھی کئی بار ہو چکی ہے۔ پچ کی تبدیلی آئی سی سی کے پچ کنسلٹنٹ کے علم میں تھی۔آئی سی سی کے بیان کے برعکس بی سی سی آئی حکام کا پچز کی تبدیلی کے حوالے سے کہنا ہے کہ یہ تبدیلیاں گجرات کرکٹ ایسوسی ایشن کی تجاویز پر کی گئیں ۔
