کیمرا کیسے کام کرتا ہے؟
جو لوگ کیمرے سے تصویریں بناتے ہیں، ان میں سے اکثر لوگوں کو اس بات کا علم نہیں ہوتا کہ تصویر کھینچنے کا عمل کس طرح واقع ہوتا ہے۔
کیمرے کے آگے جو عدسہ لگا ہوتا ہے وہ تو سب کو نظرآتا ہے اور اس کا استعمال بھی اکثر لوگوں کو آتا ہے۔ آپ کاغذ کے ایک ٹکڑے سے چند انچ کے فاصلے پر عدسے کو رکھ کر واضح شبیہ حاصل کرنے کی کوشش کریں۔ اگر آپ یہی عمل اپنے کمرے میں بیٹھ کر کھڑکی کو عدسے میں واضح کرنے کی کوشش کریں گے تو عدسے کو تھوڑا سا آگے پیچھے کرنے سے اس کھڑکی کی واضح شبیہ نظر آنے لگی گی۔ اسی طرح کیمرا بھی کام کرتا ہے اور منظر کو فوکس کرتا ہے۔
جب آپ کیمرے کے عدسے میں تصویر یا کسی منظر کو فوکس کرتے ہیں تو زیادہ درست اور واضح تصویر حاصل کرنے کیلئے آپ کو کیمرے کے عدسے میں سے نکلنے والی کیمرے کی روشنی کی مقدار کو کنٹرول کرنا پڑتا ہے۔ روشنی کی مقدار کو کنٹرول کرنے کے دو طریقے ہیں، ایک طریقہ یہ ہے کہ اس سوراخ کا قطر کم یا زیادہ کردیا جائے جس میں سے روشنی گزرتی ہے، اس سوراخ کو اپر چر کہتے ہیں۔ دوسرا طریقہ یہ ہے کہ کیمرے کے شٹر کھلنے کے وقت یا دورانیے میں کمی بیشی کی جائے۔
اپرچر میں تبدیلی کا اندازہ آپ کو اپنی آنکھ سے ہو سکتا ہے۔ اگر آپ کیمرے کے عدسے میں سے کسی منظر کو دیکھیں گے درحقیقت آپ کیمرے کے عدسے کو اپنی آنکھ عدسے سے دیکھ رہے ہوں گے۔
کیمرے کے شٹر کے چلنے کے عمل کو دیکھنے کی ضرورت نہیں ہوتی ہے۔ کیمرے کاشٹر نہایت سرعت اور تیز رفتاری سے کھلتا ہے اور سیکنڈ سے بھی کئی گنا کم وقت میں روشنی کیمرے کے اندر داخل ہوتی ہے اور شٹر بند ہو جاتا ہے۔ یہ سارا عمل انتہائی کم وقت میں پورا ہو جاتا ہے۔ واضح اور بہترین فوٹو کھینچنے کیلئے ضروری ہے کہ فلم تک روشنی مناسب مقدار سے زائد نہ پہنچے۔ مقررہ مقدار سے کم یا زائد روشنی تصویر کو خراب کر دیتی ہے۔
پیشہ ورانہ مقاصد کیلئے استعمال ہونے والے کیمروں میں عدسے کا سوراخ اور شٹر کی رفتار دونوں کنٹرول کی جا سکتی ہیں۔
