مسائل اور ان کا حل
![](https://dunya.com.pk/news/ahwalesiyasat_or_mimbromahrab/img/5401_19199663.jpg)
مال یا فصل سے چوری کی صورت میں مالک کو اجروثواب ملنے کا مسئلہ سوال : اگرکوئی چورکسی شخص کے لگائے ہوئے شجر، قیمتی درخت کوچوری کرکے کاٹ کرلے جائے یاکوئی اور چیز نقدی، مال یاغلہ وغیرہ چوری کرکے لے جائے توکیا اس پر مالک کواللہ تعالیٰ کی طرف سے اجرملتاہے؟اورکیاوہ چیزمالک کی طرف سے صدقہ ہو جاتی ہے بغیر نیت کئے؟ (اے آر چودھری، ٹوبہ ٹیک سنگھ)
جواب:کسی مسلمان کو کوئی بھی تکلیف پہنچے یانقصان ہو جائے، خواہ وہ مالی نقصان ہویاجانی اگروہ اس پرصبرکرے تو اسے اس مصیبت اورنقصان کا اجروثواب ملتاہے۔یہ ثواب صرف شجرکاری کے ساتھ خاص نہیں۔ تاہم خاص طور پر درخت اور فصل میں سے چوری ہونے کی صورت میں بھی مالک کو اجروثواب ملنے کا ذکر بھی کئی احادیث میں آیا ہے۔ بخاری ومسلم کی روایت ہے حضرت انسؓ راوی ہیں کہ رسول کریمﷺنے فرمایا’’جومسلمان کوئی درخت لگاتاہے یا کھیت بوتاہے اورپھر انسان یا چرند اور پرند (مالک کی مرضی کے بغیر)اس میں سے کچھ کھالیتے ہیں تو یہ (نقصان) مالک کیلئے صدقہ ہوجاتاہے‘‘(بخاری مسلم)۔مسلم کی روایت میں حضرت جابرؓسے منقول یہ الفاظ بھی ہیں ’’اوراس میں سے جوکچھ چوری ہو جاتاہے وہ مالک کیلئے صدقہ ہے‘‘ (مظاہرحق 353/2)۔
ایک لاکھ پر 3 ہزار روپے نفع
طے کرنے کا شرعی معاملہ
سوال: میں نے اپنے ایک دوست کے پاس کچھ رقم اس بنیادپرانویسٹ کی ہے کہ سال کی مجموعی آمدنی سے نفع کے اوسط تناسب کے حساب سے ایک لاکھ پرماہانہ 3 ہزارروپے متعین کیاہے۔ اس کے مطابق وہ مجھے نفع دے گا،براہ کرم میری رہنمائی فرمائیں کہ یہ سود؍انٹرسٹ ہے؟اگرجواب اثبات میں ہو تواب تک میں جو منافع لے چکا ہوں اس کی واپسی کی کیا صورت ہوگی؟(حسین احمد،ملتان)
جواب:ایک لاکھ روپے پرماہانہ 3 ہزارروپے متعین نفع وصول کرنے کی یہ صورت ناجائز ہے کیونکہ شرعاً یہ اضافی رقم سود ہے، جس کا لین دین حرام ہے لہٰذا اس سے احتراز کرنا لازم ہے۔ اب تک جو زائد رقم آپ نے لی ہے وہ اپنے دوست کو واپس کرنا شرعاً لازم ہے اور آئندہ کیلئے شرکت یعنی پارٹنر شپ یا مضاربت کے شرعی اصولوں کے مطابق کاروبار کرنا لازم ہے۔ جس میں نفع متعین رقم کے بجائے فیصد کے اعتبار سے طے کرنا لازم ہے اور پارٹنر شپ میں نقصان کی صورت میں ہر فریق اپنے لگائے ہوئے سرمایہ کے تناسب سے نقصان برداشت کرے گا۔ آئندہ کاروبار کیلئے مکمل شرعی طریقہ کار معلوم کرکے کوئی قدم اٹھائیں ۔
فجر کی سنتیں اداکرنے کی مختلف صورتیں
سوال:فجرکی نمازکیلئے آدمی مسجدمیں گیاتوجماعت ہوچکی ہوتوکیاوہ فجرکی سنتیں اداکرکے فرض اداکرے گا؟مسجدمیں فجرکی نمازہوچکی ہواورآدمی گھرپرہوتوکیاوہ سنتیں اداکرکے فرض ادا کرے گا؟مسجدمیں فجرکی نماز ہو رہی ہواورآدمی جماعت کے ساتھ شامل ہوجائے تواب فجرکی سنتیں کب ادا کرے؟ (محمد رفیق قریشی، راولپنڈی)
جواب :پہلی اوردوسری صورت میں سنتیں پڑھ کرپھرفرض پڑھے جائیں،تیسری صورت میں طلوع آفتاب کے تقریباً 15منٹ بعدسنتیں پڑھی جائیں۔ (امدادالسائلین 2؍228)
سنن فجر کے بعد قضا نمازیں اداکرنا
سوال:کیافجرکی سنتیں اداکرنے کے بعداگرجماعت میں وقت باقی ہوتواس دوران قضانمازیں اداکی جاسکتی ہیں؟
جواب:قضاء نمازفجرکی سنتوں کے بعدبھی پڑھی جا سکتی ہے (کذافی امدادالسائلین2؍64)۔
قرآنی آیات پڑھ کر دم کرنا یا آیات
قرآنیہ کے تعویذ کی شرعی حیثیت
سوال :کسی پرقرآنی آیات پڑھ کردم کرنایاتعویذقرآنی دینا جائز ہے یانہیں؟
جواب :تعویذمیں قرآنی آیات لکھ کردینایا قرآنی آیات پڑھ کر دم کرناشرعاًجائزہے۔(جامع الترمذی 191/2)، سنن ابی داؤد، ص:388)
غیر پڑوسی کا مکان خریدنے کا دعویٰ کرنا
سوال : یعقوب،ملک امان اور شریف خان چچازادبھائی ہیں۔ ملک امان کے پاس دومکان تھے جوکہ کرایہ کے طورپرشریف خان کودیئے تھے۔ ملک امان نے شریف خان سے کہاکہ یہ دونوں مکان قیمتاً خریدلولیکن اس نے لینے سے انکارکیا۔پھر محمدیعقوب سے کہاخریدلواس نے لینے کاارادہ ظاہرکیاپھرمحمدیعقوب نے بھی شریف خان سے کہاکہ تم خریدلولیکن اس نے پھربھی انکارکیا،چنانچہ محمدیعقوب نے شریف خان کے بیٹے (عبدالباسط )اوربھائی (سلطان محمد) کو مجلس عقد میں بٹھاکرمکان ملک امان سے خریدلیا۔3 دن کے بعدشریف خان نے دعویٰ کیاکہ یہ مکان میں خریدوں گا جبکہ شریف خان کی مذکورہ مکان کے اردگرد کوئی ذاتی ملکیت بھی نہیں ہے ،کیااب شریف خان کااس مکان پرخریدنے کادعویٰ درست ہے یا نہیں ؟ وضاحت مطلوب ہے۔(:نظام الحق )
جواب:صورت مسئولہ میں شریف خان کایہ دعویٰ کہ مکان میں خریدوں گاکیونکہ اس میں میرا سامان پڑا ہے‘‘ شرعاً درست نہیں ، مذکورہ مکان خریدنے کی بناء پر محمدیعقوب کی ملکیت میں آچکاہے اب ان کی مرضی کے بغیران سے واپس لیناشرعاًجائزنہیں ،اس سے احترازلازم ہے۔
ادھار فروختگی کی صورت میں نقد کے
مقابلے میں نفع زیادہ وصول کرنا
سوال :بندہ قسطوں میں سامان فروخت کرتاہے جس میں نقدسے زیادہ رقم وصول کی جاتی ہے،یہ رقم لیناجائزہے یا نہیں؟(حافظ حسین)
جواب: ادھار بیچنے کی صورت میں نقد کے مقابلے میں نفع زیادہ وصول کرنا شرعاًجائزہے بشرطیکہ ادھار خریدو فروخت کے وقت ادھارکی پوری قیمت اوراس کی ادائیگی کی مدت اور قسطیں متعین کردی جائیں اورکسی قسط کی تاخیرپرکوئی اضافی جرمانہ نہ لگایا جائے۔ (تفصیل کیلئے دیکھئے کذافی فتاویٰ عثمانی 3؍117)