اچھی غذا کا انتخاب،موٹاپے سے بچائے
موٹاپے سے بچنا ہے تو اچھی غذا کا انتخاب کریں، کیونکہ موٹاپا نہ صرف جسمانی صحت کیلئے خطرناک ہے بلکہ ذہنی صحت پر بھی منفی اثر ڈالتا ہے۔ بڑھتا ہوا وزن دل کی بیماریوں، ذیابیطس، بلڈ پریشر، جوڑوں کے درد اور دیگر متعدد امراض کا پیش خیمہ بن سکتا ہے۔
اگر ہم اپنی روزمرہ غذا کو متوازن بنا لیں تو موٹاپے پر قابو پایا جا سکتا ہے۔
غذا وہ ایندھن ہے جو ہمارے جسم کو توانائی فراہم کرتا ہے۔ اگر یہ ایندھن صاف اور متوازن ہو تو جسم صحیح طریقے سے کام کرتا ہے، لیکن اگر یہ چکنی، مصالحے دار، یا ضرورت سے زیادہ کیلوریز والی ہو تو جسم میں چربی جمع ہونے لگتی ہے، جو آخرکار موٹاپے کا سبب بنتی ہے۔
موٹاپا ایک ایسی بیماری ہے جو کھانے پینے کی بے احتیاطی کی وجہ سے پیدا ہوتی ہے۔ ایک مرتبہ کوئی اس کا شکار ہو جائے اور وہ اس پر قابو پانے کیلئے کوئی حکمت عملی نہ اپنائے تو یہ وقت کے گزرنے کے ساتھ ساتھ انسان کو نقصان پہنچاتی رہتی ہے۔
ماہرین کے مطابق آپ کو اپنی خوراک کے بارے میں شعور ہونا چاہیے، یعنی آپ کو علم ہونا چاہیے کہ آپ کی صحت کیلئے کون سی خوراک اچھی ہے اور کون سی نہیں۔ کھانے میں ہمیشہ ایسی غذائیں منتخب کریں جو قدرتی اجزاء پر مشتمل ہوں اور کم سے کم پروسیس شدہ ہوں کیونکہ زیادہ ترپروسیس شدہ کھانوں میں غذائیت کم اور کیلوریز زیادہ ہوتی ہیں۔آپ کو ایک متوازن اور صحت مند غذا کا انتخاب کرنا چاہیے۔یہ نہ کہ صرف موٹاپے سے بچاؤ میں مدد فراہم کرے گی بلکہ مجموعی طور پر صحت کیلئے فائدہ مند ہو گی۔
اچھی غذا کے انتخاب کے بنیادی اصول
٭…ہر کھانے میں کاربوہائیڈریٹس، پروٹین، چکنائی، وٹامنز اور معدنیات کی مناسب مقدار ہونی چاہیے۔
٭…بازاری کھانے جیسے برگر، پیزا، فرنچ فرائز، چپس اور کولڈ ڈرنکس وقتی طور پر تو لذیذ لگ سکتے ہیں، لیکن یہ چکنائی اور کیلوریز سے بھرپور ہوتے ہیں جو وزن میں تیزی سے اضافے کا باعث بنتے ہیں۔
٭…پھل اور سبزیاں کھائیں،یہ غذائیں فائبر سے بھرپور ہوتی ہیں جو ہاضمہ درست رکھتی ہیں اور جسم کو اضافی چربی سے بچاتی ہیں۔
٭…پانی کا زیادہ استعمال کریں، پانی نہ صرف پیاس بجھاتا ہے بلکہ جسم سے زہریلے مادوں کو بھی نکالتا ہے۔ دن میں کم از کم 8 گلاس پانی پینا چاہیے۔
٭…چینی اور سفید آٹے سے پرہیز کریں، چینی اور سفید آٹے سے بنی اشیاء وزن بڑھانے میں اہم کردار ادا کرتی ہیں۔ ان کی جگہ گُڑ، شہد یا بھوسی والا آٹا استعمال کریں۔
٭…کھانے کے اوقات کا خیال رکھیں،وقت پر کھانا نہ صرف ہاضمہ بہتر بناتا ہے بلکہ اضافی کھانے سے بھی روکتا ہے۔ رات کے کھانے اور سونے کے درمیان کم از کم 2گھنٹے کا وقفہ ہونا چاہیے۔
صحت مند زندگی کا راز
یاد رکھیں، غذا صرف پیٹ بھرنے کا ذریعہ نہیں بلکہ ایک طرزِ زندگی ہے۔ اگر ہم وقت پر، صحیح مقدار میں اور مناسب غذا کھائیں، تو نہ صرف موٹاپے سے بچ سکتے ہیں بلکہ ایک صحت مند، متحرک اور خوشگوار زندگی گزار سکتے ہیں۔
روزانہ باقاعدگی سے ورزش
روزانہ ورزش کرنا نہ صرف کیلوریز جلانے میں مدد فراہم کرتا ہے بلکہ مجموعی صحت کو بھی بہتر بناتا ہے۔ماہرین عام طور پر روزانہ کم از کم 30منٹ کی ورزش تجویز کرتے ہیں تاکہ صحت مند طرزِ زندگی برقرار رکھا جا سکے۔جب آپ باقاعدگی سے ورزش کرتے ہیں تو اس سے آپ کو جسمانی طور پر متحرک رہنے میں مدد ملتی ہے۔اس عادت سے آپ کو وزن کنٹرول کرنے، دل کی صحت بہتر بنانے، ذہنی سکون حاصل کرنے اور دیگر کئی شاندار طبی فوائد حاصل ہوتے ہیں۔
سکون والی نیند سوئیں
نیند کو موٹاپے کے خطرے کے طور پر اکثر نظر انداز کیا جاتا ہے تاہم تحقیق سے یہ ثابت ہوا ہے کہ گزشتہ برسوں میں نیند کے مجموعی دورانیے میں نمایاں کمی آئی ہے۔ ناکافی نیند نہ صرف وزن میں اضافے کا باعث بنتی ہے بلکہ دیگر کئی صحت کے مسائل کے خطرے کو بھی بڑھا دیتی ہے۔
