جادوئی ہانڈی
ایک غریب عورت اپنے بیٹے کے ساتھ رہتی تھی۔ ایک دن ایک امیر آدمی ان کے گھر آیا تو ماں نے اپنے بیٹے سے کہا، جائو مہمان کے کھانے کیلئے کچھ لے آؤ۔ بیٹے نے ہانڈی میں چاول کا صرف ایک دانہ ڈالا اور اسے پکنے کیلئے چولھے پر چڑھا دیا۔
امیر آدمی بہت حیران ہوا اور بولا: تم نے ہانڈی میں صرف ایک دانہ ڈالا ہے۔ یہ میرے کھانے کیلئے کافی نہیں ہے۔
بیٹے نے کہا: فکر نہ کریں، بس انتظار کریں۔ امیر آدمی خاموش رہا اور بیٹا باورچی خانے میں چلا گیا۔
جب چاول پک گئے تو بیٹا ہانڈی لے کر آیا اور اس میں سے چاول باہر نکالے۔ ایک پیالہ بھرا اور ادب سے اس امیر آدمی کے سامنے رکھ دیا۔
امیر آدمی نے حیرت سے پوچھا: تم نے ایک دانے سے ایک پیالہ چاول کیسے حاصل کر لیا؟
عورت نے جواب دیا: یہ ایک جادوئی ہانڈی ہے۔ اگر اس میں چاول کا ایک دانہ بھی پکایا جائے تو پورا پیالہ بھر جاتا ہے۔
امیر آدمی نے ہانڈی خریدنا چاہی۔ پہلے تو عورت نے انکار کردیا، لیکن جب امیر آدمی نے اسے چاندی کے دو سو سکے پیش کیے تو وہ مان گئی۔
امیر آدمی ہانڈی خرید کر گھر لے گیا۔ اس نے دیکھا کہ وہ اندر سے بہت گندی ہے۔ اس نے اسے دھو کر اس میں چاول کا ایک دانہ ڈالا اور ڈھکن بند کر دیا۔ جب ہانڈی پک گئی تو اس نے ڈھکن اٹھایا تو اندر صرف ایک ہی دانہ تھا۔
امیر آدمی کوبہت غصہ آیا۔ وہ واپس عورت کے گھر آیا اور سارا واقعہ اسے سنایا۔
عورت کے بیٹے نے پوچھا: کیا آپ نے ہانڈی صاف کی تھی؟
امیر آدمی نے جواب دیا:ہاں، کیوں کہ وہ گندی تھی۔
عورت کے بیٹے نے کہا: اس ہانڈی کو صاف نہیں کیا جا سکتا۔ اگر آپ اسے صاف کردیں گے تو یہ عام ہانڈی جیسی بن جاتی ہے۔
امیر آدمی نے کچھ نہ کہا اور شرمندگی کے ساتھ واپس اپنے گھر چلا گیا۔
