روبوٹک سائیکل
اسپیشل فیچر
حیران کن کرتب دکھانے والی
ٹیکنالوجی کی دنیا میں روبوٹس اب محض انسانوں کے معاون نہیں رہے بلکہ ایسے حیران کن کرتب بھی دکھانے لگے ہیں جن کا تصور کبھی صرف سائنس فکشن فلموں تک محدود تھا۔ ایک جدید روبوٹک سائیکل نے اپنی غیر معمولی صلاحیتوں سے سب کو حیران کر دیا ہے، جو نہ صرف اگلا یا پچھلا پہیہ اٹھا کر اسٹنٹ کرتی ہے بلکہ بلند چھلانگیں لگانے اور ہوا میں آگے کی جانب قلابازی کھانے کی بھی صلاحیت رکھتی ہے۔
اگر بیٹ مین کو اپنی نئی بیٹ پوڈ (Batpod) کی ضرورت پڑ جائے تو ممکن ہے انجینئرز نے اس کا متبادل تیار کر لیا ہو۔محققین نے مصنوعی ذہانت سے لیس ایک ایسی روبوٹک سائیکل تیار کی ہے جو پچھلا پہیہ اٹھا کر چلنے، رکاوٹوں کے اوپر سے چھلانگ لگانے اور یہاں تک کہ ہوا میں آگے کی جانب قلابازی کھانے کی صلاحیت رکھتی ہے۔ یہ کرتب معروف فلموں میں دکھائے جانے والے کردار ''ڈارک نائٹ‘‘ کے حیرت انگیز اسٹنٹس سے مشابہت رکھتے ہیں۔
اس مشین کو الٹرا موبیلٹی وہیکل (UMV) کا نام دیا گیا ہے۔ اس کی تیاری کا خیال پہاڑی علاقوں میں سائیکل چلانے والے ماہر سائیکلسٹ اور دشوار گزار راستوں پر کرتب دکھانے والے رائیڈرز سے لیا گیا ہے۔ عام روبوٹس کے برعکس جو توازن برقرار رکھنے کیلئے متعدد پہیوں یا ٹانگوں کا سہارا لیتے ہیں، یہ روبوٹک سائیکل صرف دو پہیوں پر اپنا توازن قائم رکھتی ہے۔ اس کے ڈیزائن کا بنیادی حصہ ایک طاقتور متحرک وزن ہے، جو روبوٹ کو مختلف حرکات کے دوران اپنا وزن تبدیل کرنے اور اپنی رفتار و قوتِ حرکت کو قابو میں رکھنے کے قابل بناتا ہے۔یہ جدید نظام اسے مختلف حیران کن کرتب دکھانے کی صلاحیت دیتا ہے، جن میں ایک جگہ رک کر توازن برقرار رکھنا، پچھلے پہیے پر اچھلنا اور رکاوٹوں کے اوپر سے چھلانگ لگانا شامل ہیں۔اگرچہ اس کا موجودہ نمونہ اتنا چھوٹا ہے کہ اس پر کوئی انسان سوار نہیں ہو سکتا، تاہم توازن برقرار رکھنے اور رکاوٹوں کو عبور کرنے کی اس کی غیر معمولی صلاحیت مستقبل میں انتہائی پھرتیلی ذاتی سواریوں کی تیاری میں مددگار ثابت ہو سکتی ہے۔ ایسی سواریاں ان راستوں پر بھی سفر کر سکیں گی جہاں عام سائیکلوں اور اسکوٹروں کا پہنچنا ممکن نہیں ہوتا۔
23.5 کلوگرام وزنی اس روبوٹک سائیکل کو امریکی ریاست میساچوسٹس میں قائم ادارے روبوٹکس اینڈ اے آئی انسٹی ٹیوٹ کی ایک ٹیم نے تیار کیا ہے۔یہ روبوٹ فی سیکنڈ آٹھ میٹر کی رفتار سے حرکت کر سکتا ہے اور اپنے قد سے 130 فیصد زیادہ اونچی رکاوٹوں کو پھلانگنے کی صلاحیت رکھتا ہے۔محققین نے اس کی تیاری اور ڈیزائن سے متعلق تحقیق سائنسی جریدے سائنس روبوٹکس میں شائع کی ہے۔ ان کا کہنا ہے کہ پہاڑی راستوں پر سائیکل چلانے والے ماہر رائیڈرز اچھلنے، چھلانگ لگانے، توازن برقرار رکھنے اور ایک یا دونوں پہیوں پر سائیکل چلانے کی صلاحیت رکھتے ہیں۔یہی ہمہ جہت صلاحیت انہیں ہموار راستوں پر تیز رفتاری اور توانائی کی بچت کے ساتھ سفر کرنے جبکہ ناہموار راستوں پر غیر معمولی پھرتی دکھانے کے قابل بناتی ہے۔
محققین کے مطابق، انہی ماہر سائیکلسٹس سے متاثر ہو کر انہوں نے الٹرا موبیلٹی وہیکل نامی روبوٹک پلیٹ فارم کا ڈیزائن اور کنٹرول سسٹم تیار کیا ہے، جو سائیکل کے ڈھانچے اور ایک متحرک وزنی نظام کو یکجا کرتا ہے۔ اس کی بدولت روبوٹ کم سے کم موٹرائزڈ حرکتی نظام کے ساتھ متحرک انداز میں مختلف کرتب دکھا سکتا ہے۔اس مشین کی تیاری کیلئے تحقیقی ٹیم نے کمپیوٹر سیمولیشنز کے ذریعے درجنوں مختلف ڈیزائن آزمائے اور ان کے نتائج کا جائزہ لینے کے بعد سائیکل سے مشابہ حتمی ساخت کا انتخاب کیا۔محققین نے بالخصوص روبوٹ کی دو اہم صلاحیتوں کو بہتر بنانے پر توجہ دی۔ پہلی یہ کہ وہ زیادہ سے زیادہ بلندی تک چھلانگ لگا سکے اور دوسری یہ کہ صرف ایک پہیے پر چلتے ہوئے بھی اپنا توازن برقرار رکھ سکے۔
عام سائیکلوں کے برعکس، جنہیں کھڑا رکھنے کیلئے اسٹینڈ، اضافی پہیوں یا بھاری وزنی نظام کی ضرورت ہوتی ہے، الٹرا موبیلٹی وہیکل اپنا توازن برقرار رکھتی ہے۔ اس روبوٹ کا زیادہ تر وزن ایک متحرک حصے میں مرکوز ہے، جسے سائیکل کے فریم کے اوپر نصب کیا گیا ہے۔ یہ حصہ روبوٹ کو اپنا جسم اسی طرح مختلف سمتوں میں حرکت دینے کی سہولت فراہم کرتا ہے، جیسے کوئی ماہر سائیکلسٹ کرتب دکھاتے ہوئے اپنے جسم کا وزن تبدیل کرتا ہے۔
اس کے بعد انجینئرز نے مصنوعی ذہانت کی ایک تکنیک ری انفورسمنٹ لرننگ کے ذریعے اسے ورچوئل ماحول میں تربیت دی۔ اس طریقہ کار میں سافٹ ویئر بار بار کوشش اور غلطی کے ذریعے خود سیکھتا ہے اور اپنی کارکردگی بہتر بناتا ہے۔ روبوٹ نے حقیقی دنیا میں اپنی صلاحیتوں کا مظاہرہ کرنے سے پہلے ہزاروں مرتبہ مختلف حرکات کی مشق کی۔ اس دوران اس نے آگے اور پیچھے چلنے، ایک جگہ رک کر سائیکل کا توازن برقرار رکھنے، صرف ایک پہیے پر پہلو کی جانب اچھلنے اور اپنی جگہ پر گھومنے جیسے کئی کرتب سیکھے۔
محققین کے مطابق، اس کی سب سے حیران کن صلاحیتوں میں سے ایک شمّی ٹرن (Shimmy Turn) ہے، جس میں روبوٹ مخصوص انداز سے تیزی کے ساتھ اپنی سمت تبدیل کرتا ہے۔ دلچسپ بات یہ ہے کہ یہ حرکت انجینئرز نے اسے باقاعدہ پروگرام کرکے نہیں سکھائی بلکہ مصنوعی ذہانت کے نظام نے تربیت کے دوران خود ہی دریافت کرلی۔یہ روبوٹ خودکار طور پر اپنے راستے میں آنے والی رکاوٹوں کی نشاندہی کرکے ان کے قریب پہنچ سکتا ہے اور ایک میٹر بلند پلیٹ فارم پر چھلانگ لگا کر چڑھنے، اس پر سفر کرنے اور دوسری جانب نیچے اترنے کی صلاحیت رکھتا ہے۔
