ٹیم ورک کا مظاہرہ کرنیوالے کھلاڑی ناکام نہیں ہوتے :محسن نقوی
لاہور(سپورٹس ڈیسک ) چیئرمین پی سی بی محسن نقوی نے کہا ہے کہ میدان میں ٹیم ورک کا مظاہرہ کرنے والے کھلاڑی ناکام نہیں ہوتے ہیں۔
لاہور میں انہوں نے آئی سی سی ورلڈ کپ کوالیفائر کیلئے تیاری کرنے والی پاکستان ویمن ٹیم کے کیمپ کا دورہ کیا۔اس موقع پر محسن نقوی نے کھلاڑیوں کی تیاریوں کے حوالے سے اپ ڈیٹس لیں اور خواتین کھلاڑیوں کا پریکٹس سیشن دیکھا۔ انہوں نے تربیتی کیمپ میں پلیئرز سے ملاقات بھی کی، کھلاڑیوں سے گفتگو میں انہوں نے کہاکہ امید ہے کہ آپ بہتر کھیل کا مظاہرہ کریں گی، کوالیفائر میں فائٹنگ اسپرٹ کے ساتھ کھیلیں گی۔کھلاڑیوں سے ملاقات کرکے ان کا حوصلہ بڑھایا اور کوالیفائر کیلئے نیک تمناؤں کا اظہار کیا، جبکہ کوچز سے کھلاڑیوں بارے فیڈ بیک لیا۔ دریں اثنا ہیڈ کوچ محمد وسیم کی نگرانی میں کھلاڑیوں نے رننگ، باؤلنگ اور بیٹنگ کی بھرپور مشقیں کیں۔ کوچز نے کھلاڑیوں کو باؤلنگ کی ٹپس دیں۔ ہیڈ کوچ محمد وسیم نے کہاکہ ورلڈ کپ کوالیفائر کے لئے تیار ہیں۔ انہوں نے ویسٹ انڈیز اور بنگلہ دیش کو ٹف حریف قرار دیا۔واضح رہے کہ ویمنز کیمپ کا دوسرا مرحلہ آج ختم ہوگا۔ خواتین کھلاڑی عید الفطرکی چھٹیوں کے بعد ورلڈ کپ کوالیفائر کیلئے دوبارہ لاہور میں جمع ہونگی۔
