×

تجارت

شارجہ میں خوشبوؤں کی بڑی ایکسپو سج گئی،200 کمپنیوں کی شرکت

بند کریں

شارجہ: (سید مدثر خوشنود) شارجہ ایکسپو سینٹر میں خوشبوؤں کی بڑی نمائش سج گئی، جہاں امارات پرفیومز اینڈ عود نمائش کے چوتھے دور اور مڈل ایسٹ آرائشِ حسن شو کے دوسرے دور کا باقاعدہ افتتاح کیا گیا۔

خوشبوؤں، عود، بخور، آرائشِ حسن اور ذاتی نگہداشت کے شعبوں سے وابستہ مقامی، علاقائی اور عالمی کمپنیوں نے اس نمائش میں بھرپور شرکت کی ہے۔

نمائشوں کا افتتاح شارجہ چیمبر آف کامرس اینڈ انڈسٹری کے چیئرمین عبداللہ سلطان العویس اور ایکسپو سینٹر شارجہ کے چیف ایگزیکٹو سیف محمد المدفع نے کیا۔

افتتاحی تقریب میں حکام، کاروباری شخصیات، صنعت کاروں اور شریک اداروں کے نمائندے بھی موجود تھے، جنہوں نے مختلف حصوں کا دورہ کیا اور نئی خوشبوؤں، عود، بخور اور آرائشِ حسن کی مصنوعات کا جائزہ لیا۔

امارات پرفیومز اینڈ عود نمائش میں 200 سے زائد کمپنیاں اور تقریباً 700 تجارتی نام شریک ہیں۔

نمائش میں مشرقی اور مغربی خوشبوئیں، عود آئل، بخور، ملی جلی خوشبوئیں، جسم اور بالوں کے لیے خوشبودار مصنوعات، بخور دان، خوشبودار موم بتیاں اور خوشبوؤں سے متعلق دیگر اشیا پیش کی جا رہی ہیں۔

اسی کے ساتھ مڈل ایسٹ آرائشِ حسن شو بھی جاری ہے، جہاں حسن و آرائش، جلد کی دیکھ بھال، بالوں کی نگہداشت اور ذاتی استعمال کی مصنوعات سے وابستہ کمپنیوں کو اپنی نئی اشیا اور تازہ رجحانات پیش کرنے کا موقع مل رہا ہے۔

دونوں نمائشیں خریداروں، صنعت کاروں، تاجروں اور خوشبوؤں و حسن کے شعبے سے وابستہ ماہرین کے لیے اہم کاروباری پلیٹ فارم بن گئی ہیں۔

ایکسپو سینٹر شارجہ کے چیف ایگزیکٹو سیف محمد المدفع کے مطابق دونوں نمائشوں کا ایک ساتھ انعقاد شارجہ کے اس کردار کو مضبوط کرتا ہے جس کے تحت امارت کاروباری ترقی، تجارتی روابط اور مختلف شعبوں کے درمیان تعاون کے لیے سازگار ماحول فراہم کر رہی ہے۔

ان کا کہنا تھا کہ شارجہ کا اہم محلِ وقوع اور علاقائی و عالمی منڈیوں سے مضبوط رابطہ شریک کمپنیوں کے لیے نئے مواقع پیدا کرتا ہے۔

نمائش میں متحدہ عرب امارات، سعودی عرب، سلطنت عمان، قطر، کویت، چین، ترکیہ اور بھارت سمیت مختلف ممالک کے ادارے شریک ہیں، جس سے زائرین کو خوشبوؤں کی مختلف روایات، منڈی کے نئے رجحانات اور مصنوعات کے وسیع انتخاب کو قریب سے دیکھنے کا موقع مل رہا ہے۔

دونوں نمائشیں 18 اکتوبر 2026 تک شارجہ ایکسپو سینٹر میں جاری رہیں گی۔