ٹی 20 ورلڈکپ: یوگنڈا کے 43 سالہ باؤلر نے تاریخ رقم کر دی
پروویڈینس: (ویب ڈیسک) امریکا اور ویسٹ انڈیز میں جاری ٹی 20 ورلڈکپ میں یوگنڈا کے 43 سالہ باؤلر نے نئی تاریخ رقم کر دی۔
آئی سی سی ٹی 20 ورلڈ کپ کے نویں میچ میں یوگنڈا نے پاپوا نیو گنی کو 3 وکٹوں سے شکست دیکر ٹورنامنٹ میں پہلی کامیابی سمیٹی۔
لو سکورنگ میچ میں 78 رنز کے ہدف کے تعاقب میں ایک موقع پر پاپوا نیو گنی کے خلاف یوگنڈا کی 5 وکٹیں صرف 26 رنز پر گر گئی تھیں لیکن ریاضت علی شاہ کی 33 رنز کی بہترین اننگز کی بدولت یوگنڈا نے ہدف 19 ویں اوور میں پورا کر لیا۔
اس میچ میں پاپوا نیو گنی نے انتہائی کم ٹوٹل کا دفاع کرنے کی پوری کوشش کی تاہم اسی دوران مس فیلڈنگ، ڈراپ کیچز اور 15 وائڈ بالز پیسیفک آئی لینڈز کی ٹیم کے لیے بھاری ثابت ہوئے۔
یہ کامیابی ناصرف یوگنڈا کی جانب سے بڑی تاریخی تھی بلکہ یوگنڈا کے 43 سالہ سپنر فرینک سبگا نے بھی میچ میں نئی تاریخ رقم کی۔
فرینک سبگا نے ٹی 20 ورلڈکپ کی تاریخ کا سب سے بہترین سپیل کرایا، انہوں نے اپنے 4 اوورز کے کوٹے میں صرف 4 رنز دیکر 2 وکٹیں حاصل کیں اور دو اوور میڈن کروائے۔
