عمران کے ذریعے ملک میں انتشار کی سازش ہورہی ہے: احسن اقبال
شکر گڑھ:(دنیا نیوز) وفاقی وزیر منصوبہ بندی احسن اقبال نے کہا ہے کہ عمران خان کے ذریعے ملک میں انتشار کی سازش ہو رہی ہے۔
اپنے آبائی حلقے میں جلسے سے خطاب کرتے ہوئے وفاقی وزیرمنصوبہ بندی کا کہنا تھا کہ بانی پی ٹی آئی نے 4 سال مرکز اور پنجاب میں حکومت کی، حکومت سازشوں اور فوج دہشت گردی کے خلاف لڑ رہی ہے۔
انہوں نے کہا کہ عمران خان کے ذریعے ملک میں انتشار کی سازش ہو رہی ہے، ہم دہشت گردی کی جنگ جیت کر ملک کو دوبارہ ترقی کی راہ پر ڈالیں گے، بانی پی ٹی آئی نے عثمان بزدار اور پرویز الہٰی کو چن کر وزیر اعلیٰ لگایا، عمران خان نے 4 سالہ دورِ حکومت میں گالم گلوچ کے سوا کچھ نہیں کیا۔
احسن اقبال کا کہنا تھا کہ بانی پی ٹی آئی نے 4 سال سیاسی مخالفین کو چور ڈاکو کہنے میں گزار دئیے، عمران خان نے مجھے جھوٹے مقدمے میں اڈیالہ جیل بند کرایا، بانی پی ٹی آئی نے لوگوں سے چور اور ڈاکو کے نعرے لگوائے۔
وفاقی وزیر نے کہا کہ اگر میں بطور ممبر اسمبلی سزائے موت کے قیدی والی چکی میں رہ سکتا ہوں تو بانی پی ٹی آئی کیوں نہیں؟ کوئی سمجھتا ہے کہ عمران خان کو چکی میں نہیں ہونا چاہیے تو وہ مجھ سے بھی معافی مانگے۔
ان کا مزید کہنا تھا کہ بانی پی ٹی آئی کو جو سہنا پڑ رہا ہے وہ ان کی کرتوت کا صلہ ہے، 2018 میں کہا تھا کہ اناڑی کو نہ جانے کس کے کہنے پر مسلط جارہا ہے، بانی پی ٹی آئی نے 24 کروڑ آبادی کے ملک کی معیشت کا بیڑہ غرق کیا۔
