غزہ بورڈ آف پیس پر پاکستان سمیت 20 ممالک کے دستخط، جنگیں رکوا کر کروڑوں جانیں بچائیں: ٹرمپ
ڈیووس: (دنیا نیوز) امریکا کے صدر ڈونلڈ ٹرمپ نے کہا ہے کہ میں نے 10 ماہ میں 8 جنگیں رکوائیں، جوہری طاقتوں پاکستان اور بھارت کی جنگ رکوائی، وزیراعظم شہباز شریف نے کہا میں نے کروڑوں جانیں بچائیں۔
سوئٹزرلینڈ کے شہر ڈیووس میں ورلڈ اکنامک فورم کے 56 ویں سالانہ اجلاس کے موقع پر غزہ بورڈ آف پیس پر دستخط کئے گئے، پاکستان بھی بورڈ آف پیس کا حصہ ہوگا، پاکستان کی طرف وزیراعظم محمد شہباز شریف نے دستخط کیے، اس موقع پر شہباز شریف اور ٹرمپ کے درمیان سرگوشیاں بھی تقریب کا خاص لمحہ بن گئیں۔
غزہ بورڈ آف پیس پر امریکی صدر ٹرمپ سمیت 20 ممالک نے دستخط کر دیئے، ٹرمپ نے وزیراعظم شہباز شریف سے دستخط کرنے پر اظہار تشکر کیا، دستخط کرنے والے ممالک میں پیراگوئے، قطر، سعودی عرب، ترکیہ، ارجنٹائن، آرمینیا، آذربائیجان، بلغاریہ، ہنگری، انڈونیشیا، قازقستان، پاکستان، کوسوو شامل ہیں۔
غزہ پیس بورڈ کی دستخطی تقریب سے خطاب کرتے ہوئے امریکی صدر ٹرمپ نے کہا کہ مشرق وسطیٰ میں پائیدار امن کیلئے کوشاں ہیں، امریکی وزیر خارجہ کی کوششوں سے آج کی تقریب کا انعقاد ہوا، ہم نے ناممکن اور بڑے بڑے کام کیے، امن کوششوں کی کامیابی کے لیے پرامید ہیں۔
امریکی صدر نے کہا کہ غزہ امن بورڈ میں بہت سے ممالک شامل ہونا چاہتے ہیں، غزہ امن بورڈ میں شمولیت پر تمام ممالک کا شکرگزار ہوں، یوکرین اور روس کی جنگ میں ہزارون افراد مارے جا رہے ہیں، روسی صدر پیوٹن سے بات کی ہے۔
.jpg)
پاک بھارت جنگ کا پھر ذکر کرتے ہوئے امریکی صدر ٹرمپ نے کہا کہ میں نے پاکستان اور بھارت کی جنگ رکوائی،دونوں جوہری طاقتیں ہیں، میں نے 10ماہ میں 8جنگیں رکوائیں، وزیراعظم شہبازشریف نے کہا میں نے کروڑوں لوگوں کی جانیں بچائیں۔
ٹرمپ نے کہا کہ اسرائیل اورایران،سربیااورکوسوو،تھائی لینڈ اورکولمبیا کے درمیان تنازع ختم کرایا، آج امریکا نے دنیا کو مزید محفوظ بنادیا ہے، ہم نے ایران کی جوہری صلاحیت کا خاتمہ کیا، مصر اورایتھوپیا کے درمیان تنازع بھی ہم نے ہی حل کرایا۔
ڈونلڈ ٹرمپ نے کہا کہ ایران دو ماہ میں جوہری طاقت بن سکتا تھا، حماس کو غیر مسلح ہونا ہوگا جیسا انہوں نے وعدہ کیا، نہیں ہو گی تو تباہ کر دیں گے، جنگیں رکوانے کے بعد بہت سے ممالک کے سربراہان میرے دوست بنے، نیٹو کو دفاعی بجٹ جی ڈی پی کے 5 فیصد تک بڑھانے پر رضا مند کیا۔
امریکی صدر نے کہا کہ گزشتہ سال کی نسبت آج دنیا مزید محفوظ اورپرامن ہے، امریکی فوج دنیا کی سب سے طاقتور فوج ہے، ایران کے ساتھ بات چیت کیلئے تیار ہیں،وینزویلا کی نئی قیادت کے ساتھ اچھے تعلقات ہیں، شام کے صدر سے بات کی،شام پر عائد تمام پابندیاں ہٹائیں۔
ڈونلڈ ٹرمپ نے کہا کہ اقوام متحدہ سمیت دیگر ممالک کے ساتھ کام جاری رکھوں گا، ہر کوئی بورڈ آف پیس کا حصہ بننا چاہتا ہے، غزہ میں امن کے حوالے سے شاندار کامیابیاں حاصل کی ہیں، پرعزم ہیں کہ غزہ کو غیر مسلح کیا جائے اورتعمیر نو کی جائے، امریکا ترقی کرے گا تو دنیا ترقی کرے گی۔
