ڈومیسٹک وائلنس بل 2025 کی تفصیلات منظر عام پر آ گئی
اسلام آباد: (دنیا نیوز) بیوی بچوں کے سماجی تحفظ سے متعلق پارلیمنٹ سے منظور ہونے والے ڈومیسٹک وائلنس بل 2025 کی تفصیلات منظر عام پر آ گئی۔
بل کے مطابق اگر تعزیراتِ پاکستان کے تحت کوئی جرم گھریلو تعلق میں ہو تو سزا اسی قانون کے مطابق ہوگی، جسمانی نقصان پہنچانے والے تمام اعمال کے ذمہ دار ہوں گے، جس میں توہین آمیز، تذلیل آمیز رویہ، بشمول حسد، گالم گلوچ، دھمکیاں، جھوٹے الزامات، ترکِ تعلق، تعاقب، ہراسانی، وغیرہ شامل ہے۔
عزتِ نفس مجروح کرنے والا کوئی بھی جنسی نوعیت کا عمل قابلِ تعریز ہوگا، بل کا اطلاق بیوی، بچوں، گھر کے بزرگ افراد، لے پالک، ٹرانس جینڈرکے ساتھ رہنے والوں پر ہوگا، بیوی، بچوں یا گھر میں رہنے والے دیگر افراد کو گالی دینا جرم قرار دیا گیا۔
بیوی، بچے یا گھر میں موجود دیگر افراد کو جذباتی، نفسیاتی طور پر پریشان کرنا بھی جرم ہوگا، مرتکب افراد کو تین سال تک کی سزا، ایک لاکھ روپے تک کا جرمانہ بھی عائد کیا جا سکے گا، بیوی، بچوں کے علاوہ گھر میں معذور افراد یا بزرگ افراد کا تعاقب کرنا بھی جرم ہوگا۔
بیوی کو مرضی کے بغیر گھر میں دیگر افراد کے ساتھ رکھنا بھی قابل سزا جرم ہوگا، خاندان کے افراد کی پرائیویسی یا عزت نفس مجروح کرنا بھی جرم قرار دیا گیا، بیوی یا گھر میں رہنے والے دیگر افراد کو جسمانی تکلیف پہنچانے کی دھمکی بھی قابلِ سزا جرم ہوگا۔
گھر میں ایک ساتھ رہنے والے کسی بھی فریق پر الزام لگانے پر بھی سزا ہوگی، بیوی بچوں یا گھر میں رہنے والی دیگر فریق کا خیال نہ کرنا بھی قابلِ سزا جرم ہے، ڈومیسٹک وائلنس بل میں جنسی استحصال کیساتھ معاشی استحصال بھی شامل ہے۔
جرمانہ ادا نہ کرنے پر مزید 3 سال سزا ہوگی، عدالت میں درخواست آنے کے 7 روز کے اندر سماعت ہوگی اور فیصلہ90روز میں ہوگا،متاثرہ شخص کو مشترکہ رہائش گاہ میں رہنے کا حق حاصل ہوگا یا جوابدہ رہائش کا بندوبست کرے گا یا شیلٹر ہوم مہیا کیا جائے گا۔
تشدد کرنے والے شخص کو متاثرہ شخص سے دور رہنے کے احکامات بھی دیے جائیں گے، تشدد کرنے والے شخص کو جی پی ایس ٹریکر پہننے کی ہدایت دی جائے گی، گھریلو تشدد سے مراد جسمانی، جذباتی، نفسیاتی، جنسی اور معاشی بدسلوکی ہے اور جس سے متاثرہ شخص میں خوف پیدا ہو، یا جسمانی اور نفسیاتی نقصان ہو۔
دوسری بیوی یا طلاق کی دھمکی دینا بھی جرم قرار دیا، بیوی کو طلاق یا دوسری شادی کی دھمکی پر 3 سال تک قید ہو گی، گالی دینے، جذباتی یا نفسیاتی طور پر پریشان کرنا بھی جرم ہو گا۔
بیوی کو گھورنے پر بھی سزا ہو گی، ایسے جرائم کے مرتکب شخص کو کم سے کم 6 ماہ زیادہ سے زیادہ 3 سال تک کی سزائیں مقرر کی گئی ہیں۔
