×

تجارت

شارجہ سرمایہ کاری فورم 2026ء، کاروباری برادری کیلئے ایک بڑا پلیٹ فارم

بند کریں

شارجہ: (سید مدثر خوشنود) شارجہ سرمایہ کاری فورم 2026ء کاروباری برادری، سرمایہ کاروں، صنعت کاروں اور نئے کاروبار شروع کرنے والوں کیلئے نئے مواقع کا اہم پلیٹ فارم بننے جا رہا ہے، جہاں 60 سے زائد ممالک سے 10 ہزار سے زیادہ شرکا، 80 سے زائد مقررین اور عالمی و علاقائی کاروباری شخصیات کی شرکت متوقع ہے۔

فورم 14 اور 15 اکتوبر کو الجواہر ریسپشن اینڈ کنونشن سینٹر شارجہ میں منعقد ہوگا، جس کا نواں ایڈیشن بدلتی ہوئی معیشتوں کے موضوع کے تحت منعقد ہو رہا ہے، اس کا مقصد تیزی سے تبدیل ہوتی عالمی معیشت، سرمایہ کاری کے نئے رجحانات، مصنوعی ذہانت، صنعتی ترقی، رسدی زنجیر، سرمائے کی نقل و حرکت اور پائیدار کاروباری ترقی پر عملی گفتگو کو فروغ دینا ہے۔

یہ ایونٹ شارجہ ایف ڈی آئی آفس، انویسٹ اِن شارجہ، کی جانب سے متحدہ عرب امارات کی وزارتِ سرمایہ کاری کے تعاون سے منعقد کیا جا رہا ہے، کاروباری برادری کیلئے اس فورم کی اہمیت اس لیے بھی زیادہ ہے کہ یہاں صرف تقاریر نہیں بلکہ عملی ملاقاتوں، سرمایہ کاروں سے رابطوں، کاروباری مذاکرات، نمائش، فیصلہ ساز شخصیات سے براہِ راست ملاقاتوں اور ممکنہ شراکت داریوں کے مواقع بھی فراہم کیے جائیں گے۔

فورم میں 140 سے زائد سرگرمیاں اور 80 سے زیادہ کاروباری ملاقاتیں شامل ہوں گی، جو کمپنیوں کو نئے سرمایہ کاروں، اداروں اور مارکیٹ رہنماؤں کے ساتھ رابطے کا موقع دیں گی۔

فورم میں جدید صنعت کاری، نقل و حمل، رسد، ثقافت، سیاحت، صحت، فلاح، افرادی قوت، جدت، خوراکی ٹیکنالوجی اور ماحول دوست ٹیکنالوجی جیسے اہم شعبوں پر توجہ دی جائے گی۔

یہ شعبے ان کمپنیوں کیلئے خاص اہمیت رکھتے ہیں جو شارجہ، متحدہ عرب امارات اور وسیع تر خطے میں سرمایہ کاری، توسیع یا نئی شراکت داری کے مواقع تلاش کر رہی ہیں۔

شارجہ سرمایہ کاری فورم 2026ء میں متحدہ عرب امارات کے وزیرِ معیشت و سیاحت عبداللہ بن طوق المری سمیت اہم حکومتی اور کاروباری شخصیات کی شرکت متوقع ہے، جبکہ امارات پراپرٹیز کے بانی محمد العبار سمیت 80 سے زائد عالمی ماہرین اور کاروباری رہنما بھی مختلف نشستوں میں خیالات پیش کریں گے۔

شارجہ سرمایہ کاری فورم 2026ء کاروباری اداروں کیلئے صرف ایک کانفرنس نہیں بلکہ نئی منڈیوں تک رسائی، سرمایہ کاری روابط، شراکت داریوں، ترقیاتی حکمت عملی اور علاقائی توسیع کیلئے ایک عملی موقع سمجھا جا رہا ہے۔