ایپک سربراہی اجلاس میں صدر پوتن اور شی جن پنگ کی ملاقات کی تیاریاں جاری، کریملن
ماسکو: (شاہد گھمن) روس نے ایشیا پیسیفک اقتصادی تعاون تنظیم (ایپک) کے سربراہی اجلاس کے موقع پر صدر ولادیمیر پوتن اور چینی صدر شی جن پنگ کے درمیان ملاقات کی تیاریوں کی تصدیق کر دی۔
کریملن کے ترجمان دیمتری پیسکوف نے 2 نومبر کو صحافیوں سے گفتگو کرتے ہوئے کہا کہ دونوں رہنماؤں کی ملاقات کی تیاریاں جاری ہیں اور روس اس ملاقات کا منتظر ہے۔
دیمتری پیسکوف نے کہا کہ روس اپنے چینی دوستوں کے ساتھ سربراہی سطح کی ملاقاتوں کو ہمیشہ اہمیت دیتا ہے اور ایسی ملاقاتوں کا منتظر رہتا ہے۔
کریملن کے ترجمان کے مطابق ایپک سربراہی اجلاس میں روسی صدر کی شرکت اور ان کے دورے کا پروگرام ابھی تیاری کے مراحل میں ہے۔ اس سلسلے میں روسی حکام اجلاس کے منتظمین اور چینی فریق کے ساتھ مسلسل رابطے میں ہیں۔
دیمتری پیسکوف سے ایپک اجلاس کے موقع پر روسی صدر ولادیمیر پوتن، چینی صدر شی جن پنگ اور امریکی صدر ڈونلڈ ٹرمپ کے درمیان ممکنہ سہ فریقی ملاقات کے بارے میں بھی سوال کیا گیا۔
انہوں نے واضح کیا کہ تینوں رہنماؤں کے درمیان ممکنہ ملاقات کے حوالے سے فی الحال کوئی حتمی تفصیلات دستیاب نہیں ہیں۔
کریملن کے تازہ بیان سے واضح ہوتا ہے کہ روس اور چین کے صدور کی ملاقات کے لیے رابطے اور تیاریاں جاری ہیں، تاہم ملاقات کی حتمی تاریخ اور تفصیلی پروگرام کا اعلان ابھی نہیں کیا گیا۔
Comments / رائے دیں
Share your thoughts. Comments are reviewed before they appear publicly.
Approved Comments