ایرانی آئل کے سمگلروں کیخلاف سخت کریک ڈاؤن کے احکامات جاری
ملتان: (دنیا نیوز) حکومت نے سمگلنگ میں ملوث عناصر کے خلاف گھیرا تنگ کرنے کا فیصلہ کرتے ہوئے ایرانی آئل کے سمگلروں کے خلاف سخت کریک ڈاؤن کے احکامات جاری کر دیئے۔
نگران وزیراعلیٰ پنجاب کی ہدایت پر ایڈیشنل چیف سیکرٹری ساؤتھ پنجاب کیپٹن (ر) ثاقب ظفر نے ڈی جی خان کا دورہ کیا، کیپٹن(ر) ثاقب ظفر کے زیرصدارت کمشنر آفس ڈی جی خان میں اجلاس ہوا، اجلاس میں جنوبی پنجاب کے تمام ایڈمنسٹریٹو سیکرٹریز اور ڈی جی خان کے کمشنر اور ڈی سی نے شرکت کی۔
ایڈیشنل چیف سیکرٹری ساؤتھ پنجاب نے کہا کہ سمگلنگ کی وجہ سے ملکی معیشت کو شدید نقصان پہنچ رہا ہے، ایرانی آئل کی سمگلنگ کی وجہ ملکی خزانہ اربوں روپے کے ریونیو سے محروم ہورہا ہے، ملک سے گندم اور کھانے پینے کی اشیاء کی سمگلنگ مہنگائی کا باعث بن رہی ہے۔
کیپٹن(ر) ثاقب ظفر نے مزید کہا سمگلرز اور آئل مافیا کے خلاف بھرپور کریک ڈاؤن کیا جائے،بجلی چوری میں ملوث عناصر کے خلاف بھی سخت کارروائی کی جائے، ایڈیشنل چیف سیکرٹری ساؤتھ پنجاب کے احکامات کے بعد بلوچستان کے روٹ پر واقع جنوبی پنجاب کی داخلی چیک پوسٹوں کی مانیٹرنگ سخت کردی گئی۔
