تجارتی اداروں کیخلاف امریکی پابندیوں پر وزارت خارجہ کا موقف بھی آگیا
اسلام آباد: (دنیا نیوز) پاکستان کے بیلسٹک میزائل پروگرام سے تعلق کے الزامات پر تجارتی اداروں کے خلاف امریکی پابندیوں پر ترجمان وزارت خارجہ کا موقف بھی سامنے آگیا۔
ترجمان دفتر خارجہ کا کہنا ہے کہ پاکستان امریکا کی اس کارروائی کو جانبدارانہ سمجھتا ہے، پاکستان کا موقف ہے یہ کارروائی سیاسی ہے، ماضی میں تجارتی اداروں کی اسی طرح کی فہرستیں محض شک پر مبنی تھیں۔
انہوں نے کہا کہ ملوث اشیا کسی برآمدی کنٹرول نظام کے تحت درج نہیں ہیں، کچھ ممالک، عدم پھیلاؤ کے اصولوں پر سختی سے عمل پیرا ہونے کا دعویٰ کرتے ہوئے، اپنی پسندیدہ ریاستوں کے لیے جدید فوجی ٹیکنالوجیز کے لیے لائسنس کی ضروریات کو آسانی سے معاف کر چکے ہیں۔
ترجمان دفتر خارجہ کے مطابق یہ دوہرے معیار اور امتیازی سلوک عالمی عدم پھیلاؤ کی حکومتوں کی ساکھ کو نقصان پہنچاتے ہیں، یہ دوپرے معیار فوجی عدم توازن میں اضافہ کرتے ہیں، اس طرح کے دوہرے معیار بین الاقوامی امن و سلامتی کو خطرے میں ڈالتے ہیں۔
