شہر قائد میں گاڑیوں تلے کچلے جانے سے خاتون سمیت 2 افراد جاں بحق
کراچی: (ویب ڈیسک) شہر قائد میں ٹریفک حادثات کے دوران خاتون سمیت 2 افراد جاں بحق ہوگئے۔
گلشن اقبال کے علاقے بلاک 6 بس سٹاپ کے قریب واٹر ٹینکر کے اناڑی ڈرائیور نے خاتون کو روند ڈالا جس کے نتیجے میں وہ موقع پر ہی جاں بحق ہوگئی، واقعہ کے بعد مشتعل افراد نے پتھراؤ کر کے واٹر ٹینکر کے شیشے توڑ دیئے، متوفیہ کی لاش کو کارروائی کیلئے ہسپتال منتقل کر دیا گیا۔
نشتر روڈ گارڈن ٹریفک پولیس چوکی کے قریب تیز رفتار گاڑی کی ٹکر سے ایک شخص جاں بحق ہوگیا جس کی لاش ضابطے کی کارروائی کے لئے ہسپتال منتقل کر دی گئی۔
ریسکیو حکام کے مطابق متوفی کی شناخت 30 سالہ احمد کے نام سے ہوئی ہے جو کہ موٹر سائیکل پر سوار اور بلدیہ ٹاؤن کا رہائشی تھا جبکہ حادثہ نامعلوم گاڑی کی ٹکر سے پیش آیا۔
