ہائی لیول سرکاری افسروں کے اثاثے آن لائن جمع کرانے اور شائع کرنے کا نظام تیار
اسلام آباد: (دنیا نیوز) ہائی لیول سرکاری افسران کے اثاثے آن لائن جمع کرانے اور شائع کرنے کا نظام تیار کر لیا گیا۔
وزارت خزانہ کے مطابق سال 2026 کے آخر تک اعلیٰ افسران کے اثاثہ جات عوام کے لیے ویب سائٹ پر دستیاب ہوں گے، اینٹی منی لانڈرنگ کے لیے وفاقی و صوبائی افسران کے اثاثوں کی جانچ پڑتال بھی ہوگی۔
دستاویز کے مطابق وفاقی حکومت نے آئی ایم ایف کو آگاہ کر دیا، گریڈ 17 سے 22 کے تمام اعلیٰ افسران اپنے ملکی و غیر ملکی اثاثے ڈیجیٹلی جمع کرائیں گے۔
وفاق اور صوبوں کے تمام سول افسران کے اثاثے بھی لازمی ڈیجیٹل ہوں گے، اثاثوں کی آن لائن اشاعت کے لیے پرائیویسی اور ڈیٹا پروٹیکشن کے انتظامات شامل ہوں گے۔
دستاویز کے مطابق رسک بیسڈ ویریفکیشن کا طریقہ کار بھی متعارف کرایا جائے گا، بینکوں کو اعلیٰ سرکاری افسران کے اثاثہ جات تک رسائی دی جائے گی۔
بینک اینٹی منی لانڈرنگ کے لیے وفاقی و صوبائی افسران کے اثاثوں کی جانچ پڑتال کریں گے، سرکاری اداروں کے اہلکاروں کے اثاثوں کی بھی چھان بین کر سکیں گے۔
