ابوظہبی میں مسلح افواج اتحاد کے 50 سال، صدر یو اے ای کا خراج تحسین
ابوظہبی: (سید مدثر خوشنود) متحدہ عرب امارات آج اپنی مسلح افواج کے اتحاد کی 50 ویں سالگرہ منا رہا ہے، جسے ملک کی قومی تاریخ کے ایک اہم اور فیصلہ کن سنگِ میل کے طور پر دیکھا جا رہا ہے۔
عربین بزنس کے مطابق صدر شیخ محمد بن زاید النہیان نے اس موقع پر کہا کہ یو اے ای اپنی اصل طاقت اپنے عوام اور اپنے اتحاد سے حاصل کرتا ہے، جبکہ مسلح افواج کی جرات، عزم اور تیاری ملک کے استحکام اور خودمختاری کے تحفظ میں بنیادی کردار ادا کرتی ہے۔
رپورٹ کے مطابق 6 مئی 1976 کو امارات کی مختلف دفاعی قوتوں کو ایک متحدہ کمانڈ میں ضم کیا گیا تھا، جس کے بعد یو اے ای کے دفاعی ڈھانچے کو ایک منظم قومی بنیاد حاصل ہوئی، صدر شیخ محمد بن زاید نے اپنے پیغام میں مسلح افواج کے افسران، اہلکاروں اور شہداء کی قربانیوں کو خراجِ تحسین پیش کرتے ہوئے انہیں قوم کے محافظ قرار دیا۔
ان کے مطابق یہ سالگرہ صرف ایک تاریخی یادگار نہیں بلکہ اتحاد، وفاداری اور مسلسل قومی تیاری کی علامت بھی ہے۔
یہ سالگرہ ایسے وقت میں منائی جا رہی ہے جب خطے میں سکیورٹی اور دفاعی چیلنجز نمایاں ہیں، اس لیے اس موقع کو یو اے ای کے دفاعی عزم اور ادارہ جاتی قوت کے اظہار کے طور پر بھی دیکھا جا رہا ہے۔
سرکاری اور نیم سرکاری سطح پر جاری پیغامات میں اس بات پر زور دیا گیا کہ مسلح افواج نے گزشتہ پانچ دہائیوں میں نہ صرف ملکی سرحدوں اور قومی مفادات کا دفاع کیا بلکہ علاقائی استحکام، انسانی امداد اور قومی سلامتی کے وسیع تر اہداف میں بھی نمایاں کردار ادا کیا ہے۔
اسی مناسبت سے نائب صدر شیخ منصور بن زاید، نائب صدر و وزیرِاعظم و حاکمِ دبئی شیخ محمد بن راشد، اور دیگر اماراتی قیادت کی جانب سے بھی مبارک باد اور خراجِ تحسین کے پیغامات سامنے آئے، جن میں مسلح افواج کو قومی اتحاد کا مضبوط ستون قرار دیا گیا۔
اس پیش رفت سے یہ تاثر مزید مضبوط ہوتا ہے کہ یو اے ای اپنی فوجی، قومی اور ادارہ جاتی یکجہتی کو آج بھی ریاستی استحکام اور مستقبل کی سلامتی کی بنیادی بنیاد سمجھتا ہے۔
