آج کے پکوان
تہہ بہ تہہ یخنی پلائواجزاء : ایک کلو چاول، تین کلو گوشت، آدھا کلو کوکنگ آئل ، زعفران، لونگ، الائچی، دارچینی10 ،10 گرام، کیوڑہ 50 گرام، دہی 250 گرام، پیاز، دھنیا ادرک 30 ، 30 گرام، سیاہ مرچ ، زیرہ آدھا آدھا چائے کا چمچہ، نمک ،سرخ مرچ حسب ذائقہ۔
ترکیب :پہلے کوکنگ آئل میں پیاز لال کرکے اتار لیجیے اور اس آئل میں ایک کلو گوشت ڈال کر بھونیے۔ جب گوشت کا پانی جل جائے پھر نمک ڈالیے اور مصالحہ ادرک، دارچینی، دھنیا بھی پیس کر ڈال دیجیے اور پانی ڈال کر پکایئے۔ جب گوشت گل جائے تلی ہوئی پیاز مل کر ڈالیے اور ایک جوش دیجیے۔ پھر زعفران، لونگ، نصف پسی ہوئی الائچیاں اور سالم سیاہ و سرخ مرچ ڈال کر آگ پر رکھ دیجیے تاکہ پانی جل جائے۔ جب تھوڑا سا گھی باقی رہ جائے پھر گھی کو بطور یخنی چھان کر لونگوں سے ایک دو دفعہ بگھار دیجیے۔ پھر ایک کلو بوٹیوں میں گھی اور قدرے مصالحہ ڈال کر اور بھون کر تہہ بنا کر رکھیئے۔ پھر چاول بھگو کر باقی یخنی میں جوش دیجیے اور جب کنی رہ جائے گوشت کی تہہ پر تھوڑے سے چاولوں کو بچھایئے پھر قورمہ کی تہہ بچھائیے۔ اسی طرح تمام گوشت کی برابر تہہ دے کر باقی زعفران کیوڑہ میں حل کر کے ہر تہہ پر چھڑکتی جایئے اور اوپر سے گھی ڈال دیجیے۔ پھر آٹے سے دیگچی کا منہ بند کر کے دم پر رکھ دیجیے۔ نہایت عمدہ اور مزیدار ہو گا۔
پپڑی کا حلوا سوہن
اجزاء : میدہ ایک کلو، نشاستہ 400 گرام، چینی چار کلو، گھی ڈیڑھ کلو، اخروٹ، بادام، پستہ، چلغوزہ، کھوپرا ہر ایک 50 گرام۔
ترکیب : میدہ اورنشاستہ دونوں کو چار کلو پانی میں گھول کر آگ پر پکایئے اور کسی لکڑی سے ہلاتی جایئے۔ جب ابال آ جائے تب چینی ڈیڑھ کلو پانی میں گھول کر اس میں ڈال دیجیے۔ جب دوسرا ابال آئے تب نیچے اتار کر رات بھر پڑا رہنے دیجیے۔ صبح کو اس میں سے چوتھا حصہ لے کر آنچ پر پکایئے جب ابال آ جائے تب 250 گرام گھی ملا کر خوب ہلایئے اورلکڑی کے دستے سے خوب گھوٹیئے۔ جب گھی جذب ہو جائے تب اسی قدر رات کے سردشدہ مرکب کو اور ڈال دیجیے اور ابال آ جانے پر پھر 350گرام گھی ڈال کر گھوٹیئے۔ اسی طرح باقی گھی اور وہ کل مرکب ملا دیجیے۔ پھر کسی سیخ سے ذرا سا نکال کر دانت کے نیچے دبا کر دیکھیے کہ چپکتا ہے یا نہیں۔ اگر چپکتا ہو تو اور گھی ڈال کر جذب کر دیجیے ورنہ کسی پرات یا طشتری میں الٹ کر برتن کو سردپانی کے بڑے کونڈے میں چھوڑ دیجیے۔ اگر گری والا پسند ہو تو اخروٹ بادام، کھوپرا او رپستے تیار شدہ گھان میں ملا کر برتن میں انڈیل دیجیے۔
