سچ جھوٹ
بہت عرصہ پہلے کی بات ہے لبنان میں ایک بادشاہ حکومت کرتا تھا۔ وہاں کے لوگوں کو اپنے بادشاہ سے بہت محبّت تھی۔ بادشاہ بھی رعایا کا بیحد خیال رکھتا تھا۔ وہ اپنے بزرگوں کی تقلید کرتے ہوئے روزانہ سادہ کپڑوں میں شہر کی گلیوں میں گھوم پھر کر لوگوں کے بارے میں معلوم کرتا تھا کہ لوگ کس طرح زندگی گزار رہے ہیں۔ اگر کوئی دُکھی ہوتا تو بادشاہ اس کی مدد بھی کر دیا کرتا۔
ایک رات بادشاہ حسب ِمعمول شہر کی گلیوں میں گھوم رہا تھا۔ چلتے چلتے وہ جیل کے دروازے تک پہنچ گیا۔ جیل کے پاس سپاہی ایک چور کو پکڑ کر اندر لے جا رہا تھا۔ بادشاہ نے سوچا آج جیل کے اندر جا کر دیکھنا چاہیے کہ یہاں کیا ہوتا ہے۔
یہ سوچ کر بادشاہ جیل کے دروازے کے پاس پہنچ گیا۔ بادشاہ کو دیکھتے ہی سپاہیوں نے پہچان لیا اور تعظیم سے سر جھکا دیے۔ بادشاہ نے جب سپاہیوں کو بتایا کہ وہ جیل کا معائنہ کرنا چاہتا ہے تو سپاہی بادشاہ کو لے کر اندر چلے گئے۔
قیدیوں کو جب پتا چلا کہ بادشاہ سلامت خود چل کر اُن سے ملنے آئے ہیں تو وہ سب بادشاہ کے ارد گرد جمع ہو گئے۔ بادشاہ نے باری باری ان سے ان کے حالات پوچھے۔ بادشاہ نے ایک قیدی سے پوچھا، ’’تمہیں کس جرم کی سزا ملی ہے؟‘‘
وہ آدمی کہنے لگا، ’’بادشاہ سلامت! میں نے کوئی جرم نہیں کیا۔ میں بیگناہ ہوں۔ مجھے چوری کے الزام میں پکڑا گیا ہے حالانکہ میں نے زندگی میں کبھی چوری نہیں کی۔‘‘
بادشاہ نے جب دوسرے قیدی سے پوچھا کہ تمہارا قصور کیا ہے؟ تو اُس نے بھی روتے ہوئے بادشاہ سے کہا کہ میں بے قصور ہوں، میں نے کوئی جرم نہیں کیا لیکن سپاہی پھر بھی مجھے پکڑ کر لے آئے ہیں۔ غرض جتنے بھی قیدی تھے سبھی نے بادشاہ کو یہ یقین دلانے کی کوشش کی کہ وہ بیگناہ ہیں۔ بادشاہ سلامت سب کی باتیں سنتے رہے اور مسکراتے رہے۔ اِسی اثنا میں بادشاہ کی نظر ایک ایسے قیدی پر پڑی جو سر جھکائے الگ بیٹھا تھا۔ بادشاہ نے سپاہیوں سے کہا کہ اس آدمی کو میرے پاس لاؤ، یہ کیوں منہ چھپائے بیٹھا ہے؟ سپاہی جب اس آدمی کو بادشاہ کے پاس لائے تو بادشاہ نے پوچھا، ’’اے نوجوان! کیا بات ہے؟ تم منہ چھپائے کیوں بیٹھے ہو؟‘‘
اس آدمی نے روتے ہوئے کہا، ’’بادشاہ سلامت ! میں بیحد گناہ گار ہوں۔ میری خطائوں نے مجھے اس قابل نہیں چھوڑا کہ میں کسی کو منہ دکھا سکوں۔‘‘
بادشاہ نے کہا، ’’ہمیں بتاؤ تو سہی تم نے کیا جرم کیا ہے؟‘‘
اس شخص نے کہا، ’’میں ایک اچھا آدمی تھا۔ ہمیشہ ایمانداری سے کام کرتا تھا۔ ایک دن نجانے کیوں میرے دل میں شیطان نے گھر کر لیا اور میں نے ایک آدمی کے پیسے چرا لیے اور یوں مجھے جیل بھیج دیا گیا۔‘‘
بادشاہ نے سوچتے ہوئے کہا ’’یہاں یہ سب بے گناہ ہیں سوائے تمہارے۔ صرف تم ہی ایک ایسے آدمی ہو جو اپنے آپ کو گنا ہگاربتارہاہے۔ لہٰذا اتنے بے گناہ لوگوں میں ایک گناہ گار کو نہیں رکھنا چاہیے۔ میں تمہیں رہا کرتا ہوں۔‘‘
کچھ عرصہ گزر گیا۔ ایک بار پھربادشاہ جیل کا معائنہ کرنے آیا اور باری باری قیدیوں سے ملاقات کی۔ اِس دفعہ ہر قیدی نے بادشاہ کو اپنے جرم کی تفصیل بتائی۔ بادشاہ نے یہ سننے کے بعد حکم جاری کیا کہ یہ لوگ واقعی گناہگار ہیں۔ اِنہیں ابھی تک شرمندگی کا احساس نہیں۔ یہ بڑے فخر اور مزے سے اپنے جرائم کی کہانی سناتے ہیں،اِن کی سزا بڑھا دی جائے۔
یہ سن کر وہ لوگ بہت حیران ہوئے اور بادشاہ کے جانے کے بعد اُس کے وزیر سے پوچھنے لگے کہ جب اس شخص نے اپنے گناہ کا اعتراف کیا تھا تو بادشاہ نے اسے چھوڑ دیا تھا ، جب ہم نے گناہ کا اعتراف کیا ہے تو بادشاہ نے ہمیں مزیدسزا دی ہے۔ یہ سن کر بادشاہ کا وزیر جو بیحد عقلمند تھا اور بادشاہ کے مزاج کو سمجھتا تھا، کہنے لگا ’’پہلے آدمی کو اس لیے چھوڑا گیا کہ اس نے جرم کا اعتراف اس لیے نہیں کیا تھا کہ وہ آزاد ہونا چاہتا تھا بلکہ اس لیے کیا تھا کہ وہ اپنے کیے پہ نادم تھا۔ لیکن تم لوگوں نے پہلی دفعہ بادشاہ کو اپنی بیگناہی کی کہانی سنائی تاکہ وہ تمہیں آزاد کر دے۔ اس دفعہ گناہ کا اعتراف بھی اس لیے کیا کہ شاید بادشاہ تمہیں چھوڑ دے، اس لیے بادشاہ نے تمہیں آزاد نہیں کیا۔‘‘
