یوگا کی عادت اپنائیں گرتے بالوں کو بچائیں ، بالایم یوگا سے گنج پن یا ہلکے بالوں سے نجات ممکن
بالوں کا گرنا، خشکی، وقت سے پہلے سفید ہو جانا اور سر کی جلد کا کسی بیماری کا شکار ہو جانا یہ ایسے مسائل ہیں جن کاسامنا تقریباً ہر دوسرے شخص کو رہتا ہے جس کیلئے خواتین ادویات کے علاوہ شیمپوز بدلتی رہتی ہیں۔ بالوں کے مسائل کی بنیادی وجوہات میں غیر متوازن ہار مونز، بدہضمی، کھانے پینے اور سونے میں بے اعتدالی، ڈپریشن، ٹینشن اور طویل مدت تک کسی دوا کو استعمال کرتے رہنے سے ہونے والا ردعمل بھی ہے۔ اگر ان وجوہ کو دور کئے بغیر صرف شیمپو بدلتے رہیں تو خاطر خواہ نتائج برآمد نہیں ہو سکتے۔
یوگا صحت کے نظام کی درستگی کیلئے بے حد معاون ثابت ہو سکتی ہے۔ چند ماہ میں ہی آپ بالوں کو پہلے سے زیادہ گھنے، چمکدار اور لمبے محسوس کریں گی۔ گنج پن یا ہلکے بالوں سے نجات مل سکتی ہے۔ یوگا کی اس خاص ورزش کو Balayam Yagaکہتے ہیں۔
طریقہ کار:اپنے ہاتھوں کی انگلیوں کو اندر کی طرف موڑ لیں اور دونوں ہاتھوں کے ناخن ایک دوسرے کے ساتھ جوڑ کر آپس میں رگڑنا شروع کر یں۔ اس ورزش کو ایک سے دومنٹ تک مسلسل کریں اور دن میں جتنی بار کر سکیں کھڑے ہو کر یا بیٹھ کر کرتی رہیں۔ مسلسل ایک ماہ تک یہ آسان سی ورزش بالوں کی صحت بحال کر سکتی ہے۔ بالوں کی افزائش بڑھ جائے گی۔
سوال یہ پیدا ہوتا ہے کہ ہاتھوں کے رگڑنے سے بالوں کی نشوونما پر کیسے فرق پڑ سکتا ہے؟
اس کے پس پردہ بہت دلچسپ حقائق موجود ہیں، دراصل انسانی جسم کے زہریلے مادوں کا تعلق ہمارے ناخنوں سے ہے۔ عام طور پر جسم کے زہریلے مادے ناخنوں میں جمع ہوتے ہیں اور بڑھے ہوئے ناخنوں کو کاٹنے میں بھی یہی راز پنہاں ہے جس سے ہم زہریلے مادے جسم سے علیحدہ کرتے ہیں۔ لہٰذا ناخنوں کو رگڑنے سے جسم زہریلی کثافتوں سے پاک ہوتا ہے اور نتیجتاً جلد، ناخن اور بالوں کو صحت یاب ہونے میں مدد ملتی ہے۔
سرونگ آسن:بالوں کے مسائل دور کرنے کیلئے ایک دوسری ورزش آسن ہے۔ اس کا طریقہ یہ ہے کہ سیدھے لیٹ جائیں اور ٹانگوں کو کولہوں سمیت سیدھا اوپر اٹھالیں اور ہاتھوں سے کولہوں کو تھام لیں۔ اس پوزیشن میں خون کا ایک زبردست ریلا فوری طور پر سر کی طرف جائے گا اور سر کو سیراب کرکے بالوں کی نشوونما کو فی الفور بہتر بناتا ہے۔ تاہم سرونگ آسن کی مشق کسی ماہر یوگا تھراپسٹ کی نگرانی ہی میں کرنا چاہئے۔ اگر آپ صرف لیٹ کر ٹانگیں سیدھی اوپر کر لیں تو بھی یہ نتائج حاصل کر سکتے ہیں۔
ایک سے دو منٹ دو زانوں بیٹھنے سے بھی بالوں کی نشوونما کو بہتر بنایا جا سکتا ہے۔ اس کا طریقہ یہ ہے کہ یوگا میٹ پر دو زانوں ہو کر بیٹھ جائیں، کمر اور گردن کو ایک سیدھ میں کر لیں اور ایک سے دو منٹ بیٹھے رہیں۔ یہ یوگا کا واحد آسن ہے جو کھانے کے فوراً بعد بھی کیا جا سکتا ہے۔ اس آسن کا فائدہ یہ ہے کہ ٹانگیں مڑی ہونے کی وجہ سے جسم کے نچلے حصے میں خون کا دبائو کم اور اوپری حصے میں زیادہ ہو جاتا ہے اور اس طرح یہ آسن نہ صرف نظام ہضم کو بہتر بناتا ہے بلکہ سر، چہرے اور بالوں کو بھی سیراب کرتا ہے۔
احتیاطی تدابیر:یوگا کے ساتھ اپنی خوراک کا بھی خیال رکھیں، پوری نیند لیں، ٹینشن سے دور رہیں، بالوں پر بے تحاشہ کیمیکل استعمال نہ کئے جائیں، کم از کم ہفتے میں ایک بار تیل سے مساج کریں۔
شمشاد یوگی پاکستان کے مقبول یوگا ایکسپرٹ ہیں
