چاند کی دوست
ایک چھوٹی سی بچی تھی۔ اس کے ماں باپ وفات پاچکے تھے۔ وہ بے چاری گھر میں اکیلی رہ گئی تھی۔ ایک امیر آدمی اسے اپنے گھر لے آیا۔
اس بچی کو اس آدمی کے گھر میں بہت کام کرنا پڑتا تھا۔ وہ پانی بھر کے لاتی، کھانا پکاتی، بچوں کی دیکھ بھال کرتی اور اتنے کاموں کے بدلے بس دو وقت کی روٹی ملتی۔ کھیلنا کودنا تو کیا دو گھڑی آرام بھی نہیں کر سکتی تھی۔ وہ آدمی بہت چالاک اور بے رحم تھا اور اس کی بیوی تو میاں سے بھی دو قدم آگے تھی۔
ایک رات چاند آسمان پر چمک رہا تھا اور باہر بہت سخت سردی تھی۔ امیر آدمی کی بیوی نے اس بچی سے پانی لانے کیلئے کہا۔ بچی پانی بھرنے باہر گئی جب وہ تالاب پر پہنچی تو سردی سے اس کے پیر پتھر ہو چکے تھے۔تالاب کا پانی بھی اوپر سے جما ہوا تھا۔ بچی نے برف میں سوراخ کیا اور پانی کی بالٹی بھر کر گھر واپس آنے لگی۔ گھر کے قریب پہنچ کر وہ گر پڑی اور سارا پانی بہہ گیا۔ بچی گھبرا گئی۔
وہ خالی بالٹی لے کر گھر نہیں جا سکتی تھی۔ وہ دروازے پہ کھڑی خوف سے کانپ رہی تھی۔ آسمان پر چمکتا ہوا چاند ہنس رہا تھا۔
بچی نے چاند سے کہا ’’چندا ماموں، دیکھو تو میں کتنی دکھی ہوں۔ مجھے کوئی مشورہ دیں تاکہ میں ان ظالموں سے بچ سکوں، یہ تو مجھے مار ڈالیں گے‘‘۔
چاند اس کی فریاد سن کر زمین پر اتر آیا۔ وہ ایک خوبصورت نوجوان کے بھیس میں تھا اور سفید کپڑے پہنے ہوئے تھا۔ چاند کے بڑے بھائی سورج نے بھی بچی کی بات سن لی تھی۔ وہ بھی آدمی کی شکل میں سنہرے رنگ کے کپڑے پہنے زمین پر اتر آیا۔
سورج نے چاند سے کہا ’’میں اس دکھی لڑکی کو لینے آیا ہوں۔ اسے مجھے دے دو۔ کیوں کہ میں تم سے بڑا ہوں‘‘۔
چاند نے کہا ’’ یہ ٹھیک ہے کہ تم بڑے ہو سورج بھائی لیکن اس وقت رات ہے اور میں رات کا بادشاہ ہوں۔ اس بچی نے مجھ سے بات کی ہے، اس لئے میں اسے اپنے ساتھ لے جائوں گا‘‘۔
چاند بچی کو اپنے بازوئوں میں اٹھا کر آسمان کی طرف اُڑ گیا۔ جب سے وہ ننھی بچی چاند پر رہتی ہے اور خوش ہے۔اس طرح اس بچی کی جان ظالم میاں بیوی سے چھوٹ گئی۔
