مسائل اور ان کا حل
خیراتی ،فلاحی اداروں اور ہسپتالوں کو زکوٰۃ دیناسوال :خیراتی و فلاحی اداروںاور وہ ہسپتال جو غریبوں کا مفت علاج کرتے ہیں انہیں زکوٰۃ دے سکتے ہیں ؟
جواب :جس ادارہ کے بارے میں آپ کو یقین ہو کہ وہ زکوٰۃ کی رقم حقیقی مصرف پر شرعی طریقے کے مطابق خرچ کرتے ہیں انہیں زکوٰۃ دے سکتے ہیں۔ جس ادارہ پر آپ کویقین نہ ہو انہیں زکوٰۃ دینے سے احتراز کریں۔
نیند میں غسل فرض ہونے سے روزہ نہیں ٹوٹتا
سوال : روزے کے دوران اگر نیندکی حالت میں خود ہی غسل فرض ہو جائے تو کیا روزہ ٹوٹ جاتا ہے ؟
جواب : نہیں ۔(الھندیہ،ج1، ص208،)
روزے کی حالت میں غسل کا طریقہ
سوال : روزے کی حالت میں غسل کرنے کا کیا طریقہ ہے ؟
جواب : روزے کی حالت میں غسل کرتے ہوئے کلی کرتے اور ناک میں پانی ڈالتے ہوئے اس بات کا خیال رکھنا لازم ہے کہ پانی حلق سے نیچے اترے نہ دماغ میں پہنچے(الھندیہ،ج1، ص 199) ۔
نماز ی کے سامنے سے گزرنے کا معاملہ
سوال: مساجدمیں اکثرلوگ نماز اداکرتے وقت اس بات کاخیال نہیں رکھتے کہ اگلی صف والوں کونکلناہوتاہے، براہ کرم یہ بتائیں کہ نماز ی کے آگے سے کتنی صف کے فاصلے سے گزرنا جائز ہے؟ (محمد فیصل، لاہور)
جواب :نمازی کے سامنے سے گزرنا جائز نہیں۔بڑی مسجدمیں سترہ نہ ہونے کی صورت میں نمازی کے اتنا آگے سے گزرناجائزہے جس میں نمازی کاخشوع و خضوع متاثرنہ ہو،جس کی مقدارراجح اورمختارقول کے مطابق یہ ہے کہ اتنی مقدارآگے سے گزرے کہ سجدہ کی جگہ کودیکھتے ہوئے نمازی کی نگاہ گزرنے والے پرنہ پڑے۔ تجربہ سے ثابت ہے کہ قیام کی حالت میں سجدہ کی جگہ کودیکھتے ہوئے نمازی کی نگاہ عموماً دوصف سے متجاوز نہیں ہوتی (فتاوی عثمانی، 427/1، ردالمحتار،436/1)
افطارکے وقت اذان کا انتظار کرنا
سوال :اگر افطار کا ٹائم پورا ہو جائے اور اذان نہیں ہوئی تو روزہ افطار کرلیں یا اذان کا انتظار کرنا چاہئے ؟
جواب : اذان افطار کا وقت ہونے کی ایک علامت ہے، اصل یہ ہے کہ غروب آفتاب کے بعد روزہ افطار کیا جا سکتا ہے اور روزہ افطار کرنے میں جلدی کرنی چاہئے لہٰذا وقت ہوجانے پر روزہ افطار کیا جاسکتا ہے چاہے اذان نہ ہوئی ہو ۔
دانت نکلوانے سے روزہ نہیں ٹوٹتا
سوال :کیا دانت نکلوانے سے روزہ ٹوٹ جاتا ہے ؟ (محمد اسرار)
جواب :دانت نکلوانے سے روزہ نہیں ٹوٹتا البتہ روزہ میں دانت نکلوانے کے دوران خون نکلنے کی صورت میں اس بات کا خیال کرنا ضروری ہے کہ خون حلق سے نیچے نہ اترے، اگر خون کی مقدار تھوک سے زیادہ ہو اور حلق میں خون کا ذائقہ محسوس ہوتو روزہ فاسدہوجائیگا ۔(وفی الھندیہ ج1 ص 203)