بچوں کی سالگرہ کے لئے سجاوٹی تدابیر
عموماً بچوں میں یہ بات نوٹ کی جاتی ہے کہ وہ اپنی سالگرہ کے دن اپنے دوستوں کے ساتھ مل کر اپنی دلچسپی کا سامان کرتے ہیں۔
آپ اپنے بچوں کی سالگرہ کیلئے سجاوٹ میں یہ طریقہ بھی اپنا سکتی ہیں کہ گہرے رنگ کا پلاسٹک کا میز پوش لیں اور پھر اس پر بچوں کی سالگرہ کے حوالے سے کوئی خاص پیغام لکھیں۔ اس کے بعد اسے پٹیوں کی صورت میں کاٹ کر دروازے کی چوکھٹ پر کسی مضبوط چھڑی کے ساتھ لٹکا دیں۔ ایسے میں بچے جب بھی دروازے سے گزریں گے توخوشی محسوس کریں گے۔ سالگرہ کے موقع پر بچے پسندیدہ رنگوں اور کارٹون کریکٹرز کی بنی چیزوں سے زیادہ لطف اندوز ہوتے ہیں۔
بچوں کی سالگرہ پہ دیئے جانے والے تحائف کو ایک نئی تکنیک کے ساتھ بھی پیک کر سکتے ہیں۔ آپ تحفے کو سفید یا نسواری آرٹ پیپر میں پیک کریں اور پھر بچوں کی پسند کی مناسبت سے مختلف ڈیزائن کے سٹیکرز اور تصویریں لگا کر اس پر اپنی طرف سے خاص پیغام بھی لکھ دیں۔ اس طرح تحفہ نہ صرف خوبصورت دکھائی دے گا بلکہ یہ تحفہ کھولنے والے کو پرمسرت احساس بخشے گا۔
بچوں کی سالگرہ پر آپ صبح کے وقت انہیں پرمسرت احساس دلانے کیلئے ان کے جاگنے سے پہلے مختلف رنگوں میں غبارے پھلا کر ان کے ساتھ دھاگا باندھ لیں اور دھاگے کو کسی ٹوفی یا چاکلیٹ سے باندھ کر بیڈ کے ساتھ ہی فرش پر رکھ دیں جس سے غبارے بیڈ سے ا وپر کی جانب اٹھتے ہوئے نظر آئیں۔ بچے جب صبح نیند سے جاگیں گے تو خوشی سے پھولے نہیں سمائیں گے۔
آپ بچوں کی سالگرہ کیلئے کیک رکھنے والی میز پر رکھی گئی دوسری چیزوں کو بھی خوبصورتی کے ساتھ سجا سکتے ہیں۔ اس کیلئے آپ پلاسٹک کے گلاس یا ٹرے پر گوند کی مدد سے مختلف رنگ اور ڈیزائن کے نگ لگا لیں۔ اس سے نہ صرف میز کی خوبصورتی میں مزید اضافہ ہوگا بلکہ یہ چیزیں دیکھنے والے کی توجہ کا بھی مرکز بنیں گی۔
بچوں کی سالگرہ پر کمرہ کو سجانے کیلئے آپ پارٹی کی تھیم کے مطابق کچھ رنگین فوٹو فریم خرید کر ان میں اپنے بچوں کی تصویریں لگا کے دیوار پر لٹکا دیں یا پھر سائیڈ پر پڑی ہوئی فوٹو فریمز کو میز پر رکھ دیں، ان کو دیکھ کر بچے بے حد خوش ہوں گے۔ اگر آپ فوٹو پلیٹس پر بچوں کی پسند کے مطابق مزید نقش و نگار کرنا چاہتے ہیں تو وہ بھی کر سکتے ہیں۔
اس کے علاوہ بچوں کی سالگرہ پر ان کے برتھ ڈے کیک کا انتخاب بچوں کی پسند کے مطابق کریں۔ اس فلیور کے کیک کا آرڈر کریں جو کہ آپ کے بچے زیادہ پسند کرتے ہیں۔ کیک آرڈر کرتے ہوئے اس بات کا بھی خیال رکھیں کہ کیک کا رنگ اور اس کی بناوٹ گھر کی سجاوٹ سے مباثلت رکھتے ہوں۔
آپ کیک رکھنے والی میز پر ایک بڑے سے مرتبان میں ٹوفیاں، چھوٹے خوبصورت کھلونے اور چاکلیٹ وغیرہ ڈال کر مرتبان کو رنگ برنگے موتیوں اور دوسری چھوٹی اشیاء سے بھی بھر سکتے ہیں۔
بچوں کی سالگرہ میں آئے ہوئے دوسرے بچوں اور بڑوں کے حفاظتی اقدام کے طور پر گھر یا کسی دوسری جگہ پر کیے گئے انتظامات میں اس بات کا خاص خیال رکھیں کہ بجلی کی تاروں کو احتیاط کے ساتھ اس طرح لگائیں کہ مہمان ان سے محفوظ رہ کر نہ صرف بھرپور انداز میں بے فکری سے شرکت کریں بلکہ پارٹی سے بھی لطف اندوز ہو سکیں۔
