ویمن اِن گرین کابڑاامتحان
سہ ملکی سیریز اور ویمنز ٹی ٹوئنٹی ورلڈ کپ2026ء
آئی سی سی ویمنز ٹی 20 ورلڈ کپ کا دسواں ایڈیشن 12 جون سے 5 جولائی 2026ء تک انگلینڈ اور ویلز کی میزبانی میں منعقد ہونے جا رہا ہے، جہاں دنیائے کرکٹ کی 12 بہترین ٹیمیں چیمپئن بننے کی جنگ لڑیں گی، جن میں میزبان انگلینڈ، گزشتہ ایڈیشن کی ٹاپ پانچ ٹیمیں، آئی سی سی رینکنگ کی دو اعلیٰ ترین ٹیمیں اور کوالیفائر رائونڈز کے ذریعے جگہ بنانے والی چار ٹیمیں شامل ہیں جبکہ ہالینڈ نے تاریخ میں پہلی بار کوالیفائی کر کے سب کو حیران کیا ہے اور نیوزی لینڈ کی ٹیم بطور دفاعی چیمپئن اپنے اعزاز کا تحفظ کرنے میدان میں اترے گی۔
پاکستان کی خواتین کرکٹ ٹیم، جسے ’’ویمن ان گرین‘‘بھی کہا جاتا ہے،نے اپنے سفر کا آغاز اوائل 1997ء میں نیوزی لینڈ کے خلاف ون ڈے میچ سے کیااور اسی سال کے آخر میں بھارت میں منعقدہ ورلڈ کپ میں بھی شرکت کی، جبکہ ٹیم نے اپنا پہلا تاریخی ٹیسٹ میچ اپریل 1998ء میں سری لنکا کے خلاف کھیلا۔
اپنے ابتدائی برسوں میں پاکستانی ٹیم کو اعلیٰ سطح کی خواتین ٹیموں میں سب سے کم مسابقتی ٹیموں میں شمار کیا جاتا تھا، یہی وجہ ہے کہ 1997ء میں پہلی بار ورلڈ کپ کھیلنے کے بعد یہ ٹیم طویل عرصے تک کوالیفائی نہ کر سکی اور بارہ سال کے تعطل کے بعد 2009ء کے ورلڈ کپ میں جگہ بنانے میں کامیاب ہوئی۔تاہم وقت کے ساتھ ٹیم کی کارکردگی میں نمایاں تبدیلی آئی ہے اور وہ اب تک ٹی ٹوئنٹی ورلڈ کپ کے تمام ایڈیشنز، ویمنز ایشیا کپ اور ایشین گیمز میں باقاعدگی سے شرکت کر رہی ہے۔
اعداد و شمار کا تجزیہ کیا جائے تو9 مئی 2009ء میں آئرلینڈ کے خلاف اپنے پہلے میچ سے لے کر اب تک پاکستان نے مجموعی طور پر 187 بین الاقوامی ٹی ٹوئنٹی میچ کھیلے ہیں جن میں سے 75 میں کامیابی، 105 میں شکست، 3 ٹائی اور4 بغیر نتیجے کے رہے۔ ورلڈ کپ کے مقابلوں میں گرین شرٹس نے تمام 9 ایڈیشنز کے 36 میچوں میں شرکت کی جہاں انہیں 9 میں فتح اور 26 میں ہار کا سامنا کرنا پڑا جبکہ ایک میچ بے نتیجہ رہا، جو یہ ظاہر کرتا ہے کہ عالمی سطح پر مستقل مزاجی اور بڑے میچ جیتنے کی صلاحیت میں ابھی مزید بہتری کی ضرورت ہے۔
موجودہ صورتحال میں، قومی ٹیم نوجوان اور باصلاحیت آل رائونڈر فاطمہ ثنا کی قیادت میں آئی سی سی ٹی ٹوئنٹی ورلڈ کپ 2026ء کی تیاریوں کے سلسلے میں آئرلینڈ اور ویسٹ انڈیز کے خلاف ڈبلن میں سہ ملکی سیریز کھیل رہی ہے۔ سیریز کے دو میچ کھیلے جا چکے ہیں اور دونوں ہی میچوں میں ویسٹ انڈیز ویمن کو آئرلینڈ اور پاکستان کیخلاف کامیابی ملی ہے۔ اس سیریز کو ورلڈ کپ کیلئے کمبینیشن کو حتمی شکل دینے کیلئے انتہائی اہم قرار دیا جا رہا ہے۔
موجودہ سکواڈ کی خاص بات یہ ہے کہ جہاں منیبہ علی، گل فیروزہ، عائشہ ظفر، ارم جاوید، ایمان فاطمہ اور عالیہ ریاض جیسی ہونہار بیٹرز موجود ہیں، وہیں بائولنگ کو مضبوط کرنے کیلئے نتالیہ پرویز، سائرہ جبین، طوبیٰ حسن، رامین شمیم، سعدیہ اقبال، نشرہ سندھو، ڈیانا بیگ اور تسمیہ رباب کو شامل کیا گیا ہے، جبکہ ایمان فاطمہ، نتالیہ پرویز، رامین شمیم، سائرہ جبین اور تسمیہ رباب پہلی مرتبہ عالمی سٹیج پر پاکستان کی نمائندگی کر رہی ہیں ۔
