آج کا دن
اسپیشل فیچر
یوم ِ الحاق پاکستان
19جولائی کو دنیا بھر میں موجود کشمیری ''یوم الحاق پاکستان‘‘ کے طور پر مناتے ہیں۔19 جولائی 1947ء کو عوام کی نمائندہ جماعت آل جموں و کشمیر مسلم کانفرنس کے پلیٹ فارم پر سرینگر میں منعقدہ اجلاس میں '' الحاق پاکستان‘‘ کی قرار داد منظور کی گئی تھی۔پاکستان سے محبت کے جرم میں کشمیریوں کو نا صرف غلامی کی زنجیروں میں قید کیا گیا بلکہ قابض فوج نے ان پر مظالم کا کبھی نا تھمنے والے دور کا آغاز کیا۔ کشمیریوں کی لازوال قربانیوں کی جو داستان 1947ء میں شروع ہوئی تھی وہ آج بھی نہ صرف جار ی ہے بلکہ10 لاکھ بھارتی فوج کی درندگی اور سفاکیت کشمیریوں کے عزم کو توڑنے میں ناکام رہی ہے ۔
فارمیلس کی جنگ
1916ء پہلی جنگ عظیم کے دوران فرومیلز کی جنگ (Battle of Fromelles) لڑی گئی، جو سوم کی بڑی جنگ کا حصہ تھی۔ اس معرکے میں برطانوی اور آسٹریلوی افواج نے جرمن فوج کی مضبوط خندقوں پر بھرپور حملہ کیا تاکہ دشمن کی دفاعی لائن کو توڑا جا سکے۔ تاہم جرمن مزاحمت انتہائی سخت ثابت ہوئی، جس کے نتیجے میں اتحادی افواج کو بھاری جانی نقصان اٹھانا پڑا۔ یہ جنگ آسٹریلیا کی فوجی تاریخ کے خونریز دنوں میں شمار کی جاتی ہے۔
فضائی حادثہ
19جولائی1967ء کو امریکی ریاست نارتھ کیرولائنا میں پیڈمونٹ ایئرلائنز کی پرواز 22 کا بوئنگ 727 طیارہ ایک دو انجنوں والے سیسنا 310 طیارے سے فضا میں ٹکرا گیا۔ اس ہولناک تصادم کے نتیجے میں دونوں طیارے مکمل طور پر تباہ ہو گئے اور ان میں سوار تمام مسافر اور عملے کے ارکان جان کی بازی ہار گئے۔ جاں بحق ہونے والوں میں امریکی وزیر دفاع رابرٹ میک نامارا کے مشیر جان ٹی میک ناٹن بھی شامل تھے۔
