پراسرار ’’کائناتی لہریں‘‘
اسپیشل فیچر
چینی ماہرین فلکیات کی اہم دریافت،کہکشاں کے پوشیدہ راز کھلنے کی امید
ہم جس وسیع و عریض کائنات کا حصہ ہیں، اس میں ہماری زمین ایک معمولی سے سیارے اور سورج ایک عام سے ستارے کی حیثیت رکھتا ہے، مگر ہمارا نظامِ شمسی جس کہکشاں میں واقع ہے وہ اپنے اندر بے شمار راز سموئے ہوئے ہے۔ ملکی وے کہکشاں میں ستاروں، گیس، گردوغبار اور دیگر اجرامِ فلکی کی اربوں سال پر محیط حرکات نے اسے ایک انتہائی پیچیدہ اور متحرک نظام بنا دیا ہے۔ اب چینی ماہرین فلکیات نے اس کہکشاں کے بارے میں ایک اہم دریافت کرتے ہوئے پہلی مرتبہ بڑے پیمانے پر پھیلی ہوئی لہروں کا سراغ لگایا ہے، جو ملکی وے کی سہ جہتی ساخت اور ارتقائی تاریخ کو سمجھنے میں مددگار ثابت ہوسکتی ہیں۔
یہ اہم دریافت چینی اکیڈمی آف سائنسز کے زیر انتظام ''پرپل ماؤنٹین آبزرویٹری‘‘ (PMO) سے وابستہ محققین کی ایک ٹیم نے کی ہے۔سائنسی جریدے '' نیچر آسٹرونومی‘‘ میں شائع ہونے والی تحقیق میں سائنسدانوں کا کہنا ہے کہ یہ مشاہدات اس بات کے نئے شواہد فراہم کرتے ہیں کہ ملکی وے کی بیرونی ساخت محض ایک ہموار ڈسک پر مشتمل نہیں بلکہ اس میں بڑے پیمانے پر عمودی اتار چڑھاؤ اور لہریلی ساختیں بھی موجود ہیں۔
ملکی وے کی غیر معمولی ساخت
فلکیاتی مشاہدات سے پہلے ہی یہ معلوم ہوچکا ہے کہ ملکی وے ایک مکمل طور پر ہموار کہکشاں نہیں۔ اس کی مجموعی شکل کسی قدر ایسی خمیدہ پلیٹ یا ریکارڈ سے مشابہ ہے جس کے ایک جانب کا کنارہ اوپر اور دوسری جانب کا کنارہ نیچے کی طرف جھکا ہوا ہے۔ اس بڑے پیمانے کی بگاڑ کو فلکیات کی زبان میں ''وارپ‘‘ (Warp) کہا جاتا ہے۔ کہکشاں کے بڑے پیمانے کے اس خم کے علاوہ اس کے اندر چھوٹی اور نسبتاً باریک عمودی ساختوں کے بارے میں معلومات محدود تھیں۔ سائنسدانوں کیلئے یہ جاننا ہمیشہ ایک اہم سوال رہا ہے کہ ملکی وے کی ڈسک میں یہ اتار چڑھاؤ کیوں پیدا ہوتے ہیں اور کیا ان کا تعلق کہکشاں کے گرد موجود دیگر اجرام یا چھوٹی کہکشاؤں کی کششِ ثقل سے ہے۔چینی محققین کی حالیہ تحقیق نے اسی سوال کا ایک ممکنہ جواب پیش کیا ہے۔
''وارپ‘‘ کو الگ کیا تو نئی حقیقت سامنے آگئی
اس تحقیق میںسائنسدانوں نے پہلے ملکی وے کی بیرونی ڈسک میں موجود بڑے پیمانے کے ''وارپ‘‘ کو ماڈل کی صورت میں پیش کیا۔ اس کے بعد اس بڑے خم کے اثرات کو اعداد و شمار سے الگ کیا،تاکہ اس کے پیچھے چھپی نسبتاً باریک ساختوں کا مشاہدہ کیا جا سکے۔یہیں سے تحقیق نے ایک دلچسپ رخ اختیار کیا۔بڑے پیمانے کے خم کو نکالنے کے بعد باقی ماندہ ساخت میں واضح لہریلے عمودی اتار چڑھاؤ نظر آئے۔ یہ ساختیں کسی حد تک پانی کی سطح پر پھیلنے والی لہروں سے مشابہ دکھائی دیتی ہیں۔ سائنسدانوں نے انہیں ''کورگیشنز‘‘ (Corrugations) قرار دیا ہے۔ یہ دریافت اس لیے اہم ہے کہ پہلی مرتبہ ملکی وے کی بیرونی ڈسک میں ان لہریلی ساختوں کے بڑے پیمانے پر پھیلے ہونے کے مشاہداتی شواہد سامنے آئے ہیں۔
کہکشاں میں لہریں کیسے بنتی ہیں؟
اب سب سے اہم سوال یہ ہے کہ آخر ملکی وے میں یہ لہریں پیدا کیسے ہوئیں؟محققین کے مطابق ان ساختوں کے پیچھے ممکنہ طور پر ثقلی خلل یا بیرونی کششِ ثقل کارفرما ہے۔ جب کسی بڑی یا چھوٹی کہکشاں کی کششِ ثقل ملکی وے پر اثر انداز ہوتی ہے تو اس کے نتیجے میں ہماری کہکشاں کی ڈسک میں ارتعاش پیدا ہوسکتا ہے۔چینی محققین کا خیال ہے کہ یہ عمودی لہریں ممکنہ طور پر ایسی ہی بینڈنگ ویوز (Bending Waves)کا نتیجہ ہیں۔ یہ لہریں کہکشاں کی گیس، ستاروں اور دیگر مادے کی وسیع پیمانے پر ہونے والی عمودی حرکات کی صورت میں ظاہر ہوتی ہیں۔
سائنسدانوں نے امکان ظاہر کیا ہے کہ بونی کہکشاؤں (Dwarf Galaxies)جیسی چھوٹی سیٹلائٹ کہکشائیں جب ملکی وے کے قریب سے گزرتی ہیں تو ان کی کششِ ثقل ہماری کہکشاں کی بیرونی ڈسک کو متاثر کرسکتی ہے۔ اس ثقلی مداخلت کے نتیجے میں ملکی وے کی ڈسک میں لہریں پیدا ہوسکتی ہیں جو وقت کے ساتھ بیرونی حصوں میں پھیلتی رہتی ہیں۔
کائناتی ماضی کے سراغ
ماہرین فلکیات کیلئے کہکشاؤں میں موجود ایسی ساختیں دراصل ماضی کے واقعات کے نشان بھی ہوسکتی ہیں۔ جس طرح زمین پر کسی قدیم واقعے کے آثار ہمیں اس کے بارے میں معلومات فراہم کرتے ہیں، اسی طرح کہکشاں کی موجودہ ساخت میں موجود لہریں اور بگاڑ اس کے ماضی میں ہونے والے ثقلی تعاملات کی یادگار ہوسکتے ہیں۔اگر سائنسدان یہ معلوم کرنے میں کامیاب ہوجاتے ہیں کہ ملکی وے میں یہ لہریں کس وقت اور کس بیرونی اثر کے نتیجے میں پیدا ہوئیں تو اس سے ہماری کہکشاں کی ارتقائی تاریخ کو سمجھنے میں مدد مل سکتی ہے۔ ممکن ہے کہ ان لہروں کے ذریعے ماضی میں ملکی وے کے قریب سے گزرنے والی کسی بونی کہکشاں یا دوسرے بڑے فلکیاتی جسم کے بارے میں بھی معلومات حاصل کی جاسکیں۔
کائنات کو سمجھنے کی ایک نئی کھڑکی
چینی سائنسدانوں کی یہ تحقیق اس اعتبار سے بھی اہم ہے کہ جدید دور میں فلکیات صرف دور دراز کہکشاؤں کے مشاہدے تک محدود نہیں رہی بلکہ سائنس دان ہماری اپنی کہکشاں کی انتہائی پیچیدہ اندرونی ساخت کو بھی تین جہتی نقشوں کی مدد سے سمجھنے کی کوشش کر رہے ہیں۔30 ہزار سے زائد سالماتی بادلوں کے تفصیلی جائزے سے حاصل ہونے والے نتائج نے ملکی وے کی بیرونی ڈسک کو ایک نئے زاویے سے دیکھنے کا موقع فراہم کیا ہے۔ آنے والے برسوں میں مزید حساس دوربینوں اور جدید کمپیوٹر ماڈلز کے ذریعے ان لہریلی ساختوں کا زیادہ تفصیلی مطالعہ کیا جاسکتا ہے۔ممکن ہے مستقبل کی تحقیقات یہ واضح کردیں کہ ملکی وے میں ایسی لہریں کتنی وسیع ہیں، وہ کس رفتار سے حرکت کرتی ہیں اور ان کے پیچھے کون سے ثقلی واقعات کارفرما رہے ہیں۔
یوں چینی محققین کی یہ دریافت بظاہر کہکشاں میں موجود چند لہریلی ساختوں کا مشاہدہ ہے، لیکن اس کے مضمرات کہیں زیادہ وسیع ہوسکتے ہیں۔ ملکی وے کے ''کائناتی ارتعاشات‘‘ دراصل ہماری کہکشاں کی ایک ایسی داستان سنا رہے ہیں جو اربوں سال سے جاری ہے۔ ان لہروں کا مطالعہ نہ صرف ملکی وے کی سہ جہتی ساخت اور حرکیات کو سمجھنے میں مدد دے سکتا ہے بلکہ اس بات پر بھی نئی روشنی ڈال سکتا ہے کہ کہکشائیں کس طرح ایک دوسرے سے متاثر ہوتی ہیں اور وقت کے ساتھ اپنی شکل تبدیل کرتی ہیں۔
