میں پاکستان کے 25کروڑ عوام کا بھی کپتان :محمد رضوان
کراچی (سپورٹس ڈیسک ) پاکستان سپرلیگ 10 میں ملتان سلطان کی قیادت کرنے والے قومی کپتان محمد رضوان نے کہا ہے کہ میں ملتان سلطانز کے ساتھ پاکستان کے 25 کروڑ عوام کا بھی کپتان ہوں۔
ہر کپتان کی خواہش ہوتی ہے کہ وہ ٹائٹل جیتے ، لیگ میں بہتر سے بہتر کارکردگی کی کوشش کریں گے ، بطور کپتان ہی نہیں بطور کھلاڑی بھی دباؤ ہے ۔ نیشنل سٹیڈیم میں مشقوں کے موقع پر میڈیا سے گفتگو کرتے ہوئے انہوں نے کہا کہ ماضی میں کی جانے والی غلطیوں کو دہرانے سے اجتناب کرینگے ، مداحوں کی ناراضی اپنی جگہ درست ہے ۔فینز ہم سے خفا ہیں، وہ بھی درست ہیں کہ ہم اپنی ذمہ داری ادا نہیں کر سکے ، تنقید کے مقابلے میں محبت زیادہ ملتی ہے ۔ مداحوں کی باتیں بھی سننا پڑتی ہیں،بے جا تنقید پر افسوس ہوتا ہے ۔ ہر انسان سیکھتا ہے ، تنقید برائے اصلاح ہونی چاہیے ۔سینئرز کی ذمہ داری ہے کہ وہ اپنے جونیئرز کو سکھائیں۔اگر تنقید ہی کرتے رہے تو نفرت بڑھے گی ۔شاہد خان آفریدی کے الفاظ میرے حق میں ہیں، ان کو بطور کپتان میرے پاس اختیار نہ ہونے کا سوال نہیں کرنا چاہیے تھا۔ پاکستان سلیکشن کمیٹی کے اختیارات کا سب کو علم ہے ، یہ بات خوش آئند ہے کہ ملتان سلطانز میں مجھے اختیارات حاصل ہیں،مجھے فخر ہے کہ میں سچ بولتا ہوں۔تعلیم حاصل نہ کرنے کا افسوس ہے توجہ کرکٹ پر ہے ، مانتا ہوں کہ زیادہ اچھی انگریزی نہیں آتی۔ اگر انگریزی چاہتے ہیں تو میں پروفیسر بن جاؤں گا۔ اس سال ٹائٹل اپنے نام کرنے کی کوشش کریں گے ، مجھے گرم موسم پسند ہے ،ملتان سلطانز کے اونر علی ترین کی اپنی سوچ ہے ۔ علی ترین چاہتے ہیں کہ پاکستان کو اچھے کھلاڑی ملیں۔
