ایک سال میں ہائی اوکٹین فیول کی فروخت 3گنا بڑھ گئی
کراچی(بزنس رپورٹر)پاکستان میں ہائی اوکٹین فیول کی فروخت تاریخ کی بلند ترین سطح پر پہنچ گئی ۔
آئل کمپنیز ایڈوائزری کونسل جانب سے جاری کردہ معلومات کے مطابق ملک بھر میں ہائی اوکٹین فیول کی کھپت میں ریکارڈ اضافہ دیکھنے میں آیا ہے جو ایک سال میں 3 گنا بڑھ کر33.43ہزار ٹن تک پہنچ گئی ہے جس کی بنیادی وجہ مخصوص آئل مارکیٹنگ کمپنیوں کا ہائی اوکٹین فیول پر رعایتی نرخ کو متعارف کرنا تھا ۔ دوسری جانب عالمی اور مقامی سطح پر ایندھن کی قیمتوں میں اضافے کے باوجود ہائی اوکٹین فیول کی فروخت میں غیرمعمولی اضافہ ہوا جو کہ حیران کن ہے ۔ آٹو پارٹس مینوفیکچرز ایسوسی ایشن کے سابق چیئرمین مشہود علی کے مطابق پریمیم فیول کی مقبولیت میں اضافے کی ایک وجہ آٹو انجن کی کارکردگی کو بہتر بنانا بھی ہے ۔ آئندہ دنوں میں ہائی اوکٹین فیول کی فروخت میں مزید اضافے کا امکان ہے کیونکہ پٹرول اور ہائی اوکٹین کی قیمتوں میں زیادہ فرق نہیں ہے۔
