گندم کی کٹائی کا آ غاز ، تعمیراتی کاموں پر مز دورو ں کی قلت
تتلے عالی(نامہ نگار )محنت کش گندم کٹائی میں مصروف، کارخانوں وتعمیراتی کاموں پر مزدور نایاب ہونے لگے ۔
تفصیلات کے مطابق تتلے عالی سمیت ضلع بھر میں6لاکھ سے زائد ایکڑ پر گندم کی منظور شدہ اقسام کاشت کی گئی ہیں جو پک کر تیار ہوگئی ہیں ،مختلف شہروں میں فیکٹریوں اور نجی وسرکاری عمارتوں کی تعمیر کیلئے کام کرنے والے محنت کشوں نے درانتیوں سے گندم کی کٹائی شروع کر دی جس کی وجہ سے تعمیراتی کاموں اور کارخانوں میں مزدوروں کی کمی ہو گئی ہے ۔محنت کشوں کا کہنا ہے کہ چند دن کٹائی کرکے گندم نہ صرف سال بھر گھر میں استعمال کی جائیگی بلکہ فروخت کرکے ہزاروں روپے آمدن بھی ہو جائیگی۔کاشتکاروں کا کہنا ہے کہ محنت کشوں سے کٹائی ہوئی گندم سے تھریشر کے ذریعے مویشیوں کیلئے بھوسہ حاصل ہو جاتا ہے اس لئے درانتیوں سے کٹائی کرائی جا رہی ہے البتہ ہارویسٹر مشینوں سے گندم کی کٹائی شروع ہونے میں چار سے پانچ دن لگ سکتے ہیں۔
