ویسٹ انڈیز کو قابو کرنے کیلئے سپنرز کا جال بچھانے کا فیصلہ
لاہور: (ویب ڈیسک) پاکستان کرکٹ بورڈ (پی سی بی) نے آئندہ ہوم ٹیسٹ سیریز میں ویسٹ انڈیز کو قابو کرنے کیلئے سپنرز کا جال بچھانے کا فیصلہ کر لیا۔
ملتان میں شیڈول پاکستان اور ویسٹ انڈیز کے درمیان 2 ٹیسٹ میچز کیلئے سپن فرینڈلی پچز بنائی جائیں گی تاکہ کالی اندھی کا سپنرز کے ذریعے شکار کیا جا سکے۔
سپنر ساجد خان اور نعمان علی کی ویسٹ انڈیز کیخلاف ہوم سیریز کیلئے سکواڈ میں واپسی ہو گی۔
اس سے قبل ساجد خان کو جنوبی افریقا کی کنڈیشنز کی وجہ سے سکواڈ سے باہر کردیا گیا تھا جبکہ انکی جگہ فاسٹ باؤلر کو سکواڈ میں شامل کیا گیا تھا۔
سلیکٹرز نے ویسٹ انڈیز سیریز کیلئے سائیڈ میچز اور ٹیسٹ سکواڈ کے حوالے سے مشاورت مکمل کرلی ہے۔
واضح رہے کہ ویسٹ انڈیز کا ٹیسٹ سکواڈ پیر 6 جنوری کو اسلام آباد پہنچے گا جبکہ پاکستان اور ویسٹ انڈیز کا پہلا ٹیسٹ 17 جنوری سے شروع ہوگا، دونوں ٹیموں کے درمیان دوسرا ٹیسٹ 25 جنوری سے ملتان سٹیڈیم میں ہی کھیلا جائے گا۔
