انڈسٹری میں نئے آنے والوں کو مواقع دینا ہوں گے: یشما گل
لاہور: (ویب ڈیسک) پاکستان شوبز انڈسٹری کی خوبرو اداکارہ یشما گل نے کہا ہے کہ انڈسٹری میں نئے آنے والوں کو مواقع دینا ہوں گے۔
ایک انٹرویو میں یشما گل نے گفتگو کرتے ہوئے کہا ہے کہ اب تک میں نے شوبز انڈسڑی میں جتنا بھی کام کیا ہے میں اس بارے اپنی کارکردگی سے مطمئن ہوں، میں مسلسل محنت سے کامیابیاں حاصل کر رہی ہوں، ہرکام میں کامیابی کیلئے محنت اور اپنی منزل کا تعین ضروری ہے، سفارش کا زمانہ گیا، اب ٹیلنٹ اور معیاری کام کو ترجیح دی جاتی ہے۔
انہوں نے کہا ہے کہ پاکستان میں شوبز انڈسڑی میں جو ٹیلنٹ موجود ہے دنیا میں اسکی مثال نہیں ملتی، پاکستانی شوبز انڈسڑی میں صرف نئے آنیوالوں کو مواقع دینے کی ضرورت ہے۔
اداکارہ نے کہا ہے کہ محنت اور منزل کے تعین کے بغیر کامیابی کا امکان کم ہوجاتا ہے لہٰذا نئے آنے والوں کو اس چیز کو مدنظر رکھنا چاہئے۔
یشما گل نے اپنی نجی زندگی کے حوالے سے باتے کرتے ہوئے کہا ہے کہ میں اپنی موجودہ زندگی سے مطمئن ہوں، اور دل چاہتا ہے کہ وقت رک جائے مگر انسان کی ساری خواہشیں تو پوری نہیں ہوتیں۔
