آئینی ترمیم کے متعلق ووٹنگ: قومی اسمبلی کا اجلاس آج تک ملتوی
اسلام آباد: (دنیا نیوز) قومی اسمبلی میں مجوزہ آئینی ترمیم کیلئے ووٹنگ بارے اجلاس آج تک ملتوی کردیا گیا۔
قومی اسمبلی کا اجلاس آج دن ساڑھے 11 بجے طلب کیا گیا تھا جس کا 6 نکاتی ایجنڈا بھی جاری کر دیا گیا تھا تاہم اب قومی اسمبلی کے اجلاس کا وقت تبدیل کر دیا گیا ہے، اجلاس دن ساڑھے 11 بجے کے بجائے شام 4 بجے ہونا تھا جو شروع نہ ہوسکا، اب اجلاس رات 11 بجے کے بعد شروع ہوا جو کل تک ملتوی کردیا گیا۔
قومی اسمبلی اجلاس کے وقت میں تبدیلی سپیشل پارلیمانی کمیٹی کی خصوصی سفارش پر کی گئی۔
کمیٹی نے صبح 10 بجے کی میٹنگ کے بعد سپیکر سے کہا کہ اہم امور پر فیصلوں کیلئے وقت درکار ہے جس پر سپیکر قومی اسمبلی نے کمیٹی کی درخواست پر آج کے اجلاس کا وقت تبدیل کر دیا اور قومی اسمبلی سیکرٹریٹ نے اجلاس کے وقت کی تبدیلی کا نوٹس بھی جاری کر دیا۔
قومی اسمبلی سیکرٹریٹ کی جانب سے جاری کردہ اجلاس کے 6 نکاتی ایجنڈے میں آئینی ترامیم کا بل شامل نہیں، نمبر پورے ہونے پر آئینی ترامیم کا بل سپلیمنٹری ایجنڈے کے طور پر شامل کیا جائے گا۔
ن لیگ کا سینیٹ اور قومی اسمبلی میں اپنے ارکان کو حاضری یقینی بنانے کا حکم
وزیراعظم شہباز شریف کی جانب سے ارکان کو پارلیمنٹ میں حاضری یقینی بنانے کی ہدایت کی گئی ہے۔
علاوہ ازیں قومی اسمبلی میں مسلم لیگ (ن) کے پارلیمانی لیڈر خواجہ آصف نے ارکان قومی اسمبلی کو مراسلہ جاری کر دیا، مراسلے میں اراکین قومی اسمبلی کو آج کے اجلاس میں حاضری یقینی بنانے کی ہدایت کی گئی ہے۔
سینیٹ میں مسلم لیگ (ن) کے پارلیمانی لیڈر عرفان صدیقی نے بھی ارکان کو مراسلہ لکھتے ہوئے حاضری یقینی بنانے کی ہدایت کی ہے۔
پیپلز پارٹی کے تمام سینیٹرز و ارکان اسمبلی کو اجلاس میں شرکت یقینی بنانے کی ہدایت
پیپلز پارٹی کے سیکرٹری جنرل نیئر بخاری نے بھی پارٹی کے تمام ارکان پارلیمنٹ کو مراسلہ جاری کر دیا، مراسلے میں لکھا ہے کہ تمام سینیٹرز اور ارکان قومی اسمبلی پارلیمنٹ کے موجودہ اجلاس میں اپنی شرکت یقینی بنائیں۔
مراسلے میں مزید لکھا ہے کہ ارکان کو پارٹی قیادت کی ہدایات کے مطابق ہر قانون سازی پر ووٹ دینا ہے۔
سینیٹ کا اجلاس ملتوی کردیا گیا
قبل ازیں حکومتی اراکین کی تجویز پر سینیٹ اجلاس کا پیر کی صبح11بجے تک ملتوی کردیا گیا ہے، تاہم آئینی ترمیم سے متعلق کوئی آئٹم ایجنڈے میں شامل نہیں ہے۔
سینیٹ سیکرٹریٹ نے اجلاس کا 5 نکاتی ایجنڈا جاری کر دیا، سینیٹ اجلاس کے ایجنڈے میں دو توجہ دلاؤ نوٹس بھی شامل ہیں، اس کے علاوہ نائب وزیر اعظم اسحاق ڈار کی وقفہ سوالات معطل کرنے سے متعلق ایک تحریک بھی ایجنڈے کا حصہ ہے۔
ایوان میں صدارتی خطاب پر صدر آصف علی زرداری کے تشکر سے متعلق تحریک بھی ایجنڈے میں شامل ہے۔
