سر کا خطاب میرے لئے اعزاز، یہاں محنت کا صلہ ملتا ہے: میئر لندن صادق خان
لندن: (دنیا نیوز) میئر لندن صادق خان نے کہا ہے کہ سر کا خطاب ملنا اعزاز کی بات ہے، یہاں محنت کا صلہ ملتا ہے۔
سر کا خطاب ملنے کے بعد صادق خان نے نجی ٹی وی کو خصوصی انٹرویو دیتے ہوئے کہا کہ یہ خطاب ملنے پر خود کو بہت عاجز محسوس کر رہا ہوں، یہ اعزاز محنت کرنے والی پوری کمیونٹی کا ہے، میرے والد کو بس ڈرائیور کی نوکری ملی تھی، والدہ کپڑے سیتی تھیں، میرے والدین نے پاکستان سے یہاں آ کر محنت کی۔
ان کا کہنا تھا کہ سر کا اعزاز ملنے پر والدہ بہت جذباتی ہوگئی تھیں، ہم سب والد کو یاد کر رہے تھے، بچے مذاق کر رہے ہیں کہ گھر میں آپ سر نہیں صرف ہمارے والد ہیں، میری کامیابی ٹیم ورک کا نتیجہ ہے اور یہ ایوارڈ بھی پوری ٹیم کیلئے ہے۔
صادق خان نے کہا کہ بادشاہ سے خاصے اچھے تعلقات ہیں، وزیراعظم بھی میرے دوست ہیں۔
واضح رہے کہ برطانیہ کے بادشاہ چارلس کی جانب سے سالِ نو کے موقع پر جن افراد کو عوامی خدمات کے اعتراف میں اعزاز سے نوازا گیا ان میں میئر لندن صادق خان کا نام بھی شامل ہے، جنہیں نائٹ کے اعزاز پانے والوں کی فہرست میں شامل کیا گیا ہے۔
