شام: 5سال کیلئے 23 وزرا پر مشتمل نئی حکومت کا اعلان
دمشق(اے ایف پی )شام کے صدر احمد الشرع نے 5سال کیلئے 23 وزرا پر مشتمل نئی حکومت کا اعلان کر دیا ۔
اپنے خطاب میں صدر احمد الشرع نے کہا کہ طاقت ور اور مستحکم ریاست کی تعمیر کے لیے پر عزم ہیں، ہم اس وقت اپنی تاریخ میں ایک نئے مرحلے کا جنم دیکھ رہے ہیں۔نئی حکومت ، تبدیلی اور تعمیر کی حکومت ثابت ہو گی۔ اپنے اداروں میں بد عنوانی کو داخل ہونے کی اجازت نہیں دیں گے ۔ہم قومی فوج بنانے پر کام کریں گے جو ملک کی حفاظت کرے ۔نئی حکومت میں وزیر خارجہ اسعد الشیبانی اور وزیر دفاع مرہف ابو قصرہ نے اپنے قلم دان برقرار رکھے ۔جنرل انٹیلی جنس کے سربراہ انس خطاب کو وزیر داخلہ مقرر کیا گیا ہے ۔عبدالرحمن الویس وزیر انصاف، محمد ابو الخیر شکری وزیر اوقاف، محمد عبدالرحمن وزیر تعلیم، محمد البشیر وزیر توانائی، ہند قبوات وزیر سماجی امور، محمد یشر برنیہ وزیر خزانہ، محمد نضال الشعار وزیر معیشت، مصعب العلی وزیر صحت اور مروان الحلبی وزیر برائے اعلیٰ تعلیم ہوں گے ۔یاد رہے مسلح اپوزیشن گروپوں نے آٹھ دسمبر 2024 کو بشار الاسد کا تختہ الٹ دیا تھا جس کے بعد جنوری میں احمد الشرع 3ماہ کیلئے عبوری صدر بن گئے تھی ۔ اب نئی حکومت کا عبوری دورانیہ 5 برس تک جاری رہے گا۔عبوری مرحلے کے بعد نئے آئین کی بنیاد پر ملک میں انتخابات کا اجرا ہو گا۔
