نیاریکارڈ:ایک دن میں تولہ سونا 10ہزارروپے مہنگا
کراچی(بزنس رپورٹر)عالمی اور مقامی مارکیٹوں میں جمعہ کو سونے کی قیمت میں تاریخ کا سب سے بڑا اضافہ ریکارڈ کیا گیا ۔
جس کے بعد سونے کے نرخ تاریخ کی نئی بلند ترین سطح پر پہنچ گئے ۔ ادھر انٹربینک میں ڈالر کی قدر میں کمی ریکارڈ کی گئی ۔ تفصیلات کے مطابق عالمی بلین مارکیٹ میں سونا 100 ڈالر کے نمایاں اضافے سے 3218 ڈالر فی اونس کا ہوگیا۔بین الاقوامی مارکیٹ میں سونے کے نرخ میں نمایاں اضافے کے باعث مقامی سطح پر بھی ملکی تاریخ میں پہلی بار فی تولہ سونے کی قیمت میں 10 ہزار روپے کا ہوشربا اضافہ دیکھا گیا جس کے نتیجے میں سونے کی فی تولہ قیمت 3 لاکھ 38 ہزار 800 روپے کی نئی بلند ترین سطح پر جاپہنچی۔اسی طرح دس گرام سونے کی قیمت 8573 روپے کے بھاری اضافے سے 2 لاکھ 90 ہزار 466 روپے کی ریکارڈ سطح پہنچ گئی۔یاد رہے کہ جمعرات کو سونے کی فی تولہ قیمت 7ہزار 800 روپے کے اضافے سے 3 لاکھ 28 ہزار 800 روپے ہوگئی تھی۔دریں اثنا چاندی کی فی تولہ قیمت 3234 روپے پر مستحکم رہی۔دوسری جانب اسٹیٹ بینک کے مطابق انٹربینک میں ڈالر9پیسے کی کمی سے 280.47روپے پرآگیا۔فاریکس رپورٹ کے مطابق اوپن مارکیٹ میں ڈالر2پیسے کے اضافے سے 282.10 روپے پرجاپہنچا۔
