حکومت کی جانب سے ایسٹر پر مسیحیوں میں امدادی چیک تقسیم
سرگودھا(سٹاف رپورٹر) حکومت پنجاب کے احکامات پر ایسٹر کے موقع پر مستحق مسیحی خاندانوں کو مالی امداد کے چیک تقسیم کرنے کی تقریب کا ضلع کونسل ہال میں انعقاد کیا گیا۔
ڈپٹی کمشنر کیپٹن ریٹائرڈ محمد وسیم نے دو سو مستحق مسیحی خاندانوں میں مجموعی طور پر 30 لاکھ روپے کے مالی امداد کے چیک تقسیم کئے ۔ ہر خاندان کو 15 ہزار روپے کا چیک دیا گیا تاکہ وہ اپنی ایسٹر کی خوشیوں کو احسن انداز میں منا سکیں۔ اس موقع پر اے ڈی سی ایف اینڈ پی ڈاکٹر محمد ارشد وٹو بھی موجود تھے ۔ ڈپٹی کمشنر کیپٹن (ر) محمد وسیم کا کہنا تھاکہ ضلعی انتظامیہ حکومت پنجاب کے احکامات کی روشنی میں مستحق افراد کو مالی امداد کی فراہمی کو یقینی بنا رہی ہے ۔ انہوں نے کہا کہ حکومت پنجاب اپنے مسیحی خاندانوں کی خوشیوں میں برابر کی شریک ہے اور وزیراعلی پنجاب مریم نواز کی قیادت میں اقلیتی برادری کی فلاح و بہبود کے لئے عملی اقدامات اٹھا رہی ہے ۔ مسیحی برادری میں مالی امداد کے چیک تقسیم کرنا اسی سلسلہ کی کڑی ہے تاکہ مستحق مسیحی برادری کی ایسٹر کی خوشیاں دوبالا ہو سکیں۔ ڈپٹی کمشنر کا مزید کہنا تھا کہ پاکستان کی تعمیر و ترقی میں اقلیتوں کا کردار ہمیشہ قابل تعریف رہا ہے ۔
