پاکستان سٹاک ایکسچینج میں نئے ریکارڈز! ایک لاکھ 85 ہزار پوائنٹس کی حد بھی عبور
کراچی: (دنیا نیوز) پاکستان سٹاک ایکسچینج ٹریڈنگ کے دوران ایک بار پھر نئی حد کو عبور کر گئی۔
کاروباری ہفتے کے دوسرے روز کاروبار کے آغاز پر سٹاک ایکسچینج میں زبردست تیزی دیکھنے میں آئی، 1400 سے زائد پوائنٹس کے اضافے کے ساتھ پاکستان سٹاک مارکیٹ میں ہنڈرڈ انڈیکس ایک لاکھ 83 ہزار 834 پوائنٹس کی بلند ترین سطح پر پہنچ گیا۔
تاہم ٹریڈنگ کے دوران سٹاک ایکسچینج اچانک مثبت سے منفی زون میں چلی گئی اور انڈیکس ایک لاکھ 81 ہزار 182 پوائنٹس کی سطح پر آ گیا۔
بعدازاں ٹریڈنگ کے دوران پاکستان سٹاک مارکیٹ میں ایک بار پھر سے زبردست تیزی دیکھنے میں آئی اور کاروباری روز کے اختتام پر ہنڈرڈ انڈیکس 2653 پوائنٹس اضافے کیساتھ سٹاک ایکسچینج میں ہنڈرڈ انڈیکس ایک لاکھ 85 ہزار 62 پوائنٹس کی تاریخی سطح پر بند ہوا۔
واضح رہے کہ گزشتہ کاروباری روز کے اختتام پر پاکستان سٹاک مارکیٹ میں ہنڈرڈ انڈیکس 3373 پوائنٹس اضافے کے ساتھ ایک لاکھ 82 ہزار 408 پوائنٹس کی سطح پر بند ہوا تھا۔
