ایشیز سیریز کا آخری ٹیسٹ، سڈنی حملہ کے ہیروز کو خراج تحسین پیش
سڈنی: (ویب ڈیسک) ایشیز سیریز کے آخری ٹیسٹ میچ کے پہلے روز کھیل سے قبل سڈنی واقعے کے ہیروز کو خراج تحسین پیش کیا گیا۔
انگلینڈ اور آسٹریلیا کے درمیان جاری ٹیسٹ میچ کے دوران سڈنی کے ساحل پر فائرنگ کے واقعہ کے متاثرین کے ساتھ اظہار یکجہتی کیا گیا اور سڈنی کرکٹ گراؤنڈ میں کرین پر لکھا گیا کہ اس مشکل گھڑی میں ہم ساتھ ہیں۔
سٹیڈیم میں کرکٹ فینز نے ہیروز کا کھڑے ہو کر استقبال کیا، ہیروز کو سڈنی کرکٹ گراؤنڈ میں گارڈ آف آنر پیش کیا گیا، گارڈ آف آنر کے لیے آئی سی یو پیرا میڈک سٹاف، ڈاکٹرز، لوکل پولیس اور سیکیورٹی اہلکار بھی موجود تھے، گارڈ آف آنر کی تقریب میں دونوں ٹیموں کے کھلاڑی بھی موجود تھے۔
درجنوں جانے بچانے والے ہیرو احمد الحمد کے ساتھ 14 سالہ چایا ڈینڈن بھی تھیں، چایا ڈینڈن کو ٹانگ میں گولی لگی تھی وہ دو بچوں کو بچانے کی کوشش کر رہی تھیں۔
احمد الحمد سے عثمان خواجہ سمیت آسٹریلوی کھلاڑیوں نے ملاقات کی اور ان کی ہمت کو سراہا، اسٹیڈیم میں تماشائیوں کی طرف سے بھی ہیروز کا شکریہ ادا کیا گیا، قومی ترانوں کے بعد وزیر کھیل نیو ساؤتھ ویلز اور کرکٹ آسٹریلیا کے سی ای او نے ہیروز سے ملاقات کی اور ان کا شکریہ ادا کیا۔
واضح رہے کہ سڈنی کے ساحل پر 14 دسمبر کو فائرنگ کا واقعہ پیش آیا تھا۔ جس میں 15 افراد ہلاک ہوئے تھے۔
