شدید دھند سے حد نگاہ متاثر، موٹروے مختلف مقامات سے ٹریفک کیلئے بند
لاہور: (دنیا نیوز) شدید دھند کے باعث حدِ نگاہ متاثر ہونے سے موٹرویز کو مختلف مقامات سے ٹریفک کیلئے بند کر دیا گیا۔
ترجمان موٹروے پولیس کے مطابق موٹروے ایم 2 لاہور سے کوٹ مومن تک دھند کے باعث بند ہے، موٹروے ایم 3 فیض پور سے جڑانوالہ تک جبکہ بڑی گاڑیوں کیلئے ایم 3 پر فیض پور سے درخانہ تک ٹریفک معطل کر دی گئی ہے۔
اسی طرح موٹروے ایم ف4 پنڈی بھٹیاں سے فیصل آباد تک بند ہے، جبکہ بڑی گاڑیوں کیلئے ایم 4 پنڈی بھٹیاں سے عبدالحکیم تک آمدورفت معطل کر دی گئی ہے، لاہور سیالکوٹ موٹروے ایم 11 بھی دھند کی وجہ سے ٹریفک کیلئے بند کر دی گئی ہے۔
موٹروے پولیس کے مطابق موٹرویز کی بندش کا مقصد عوام کی جان و مال کا تحفظ ہے کیونکہ دھند میں لین کی خلاف ورزی خطرناک حادثات کا سبب بن سکتی ہے، موٹروے پولیس نے روڈ یوزرز کو ہدایت کی ہے کہ لین ڈسپلن پر سختی سے عمل کریں، غیر ضروری سفر سے اجتناب کریں اور دن کے اوقات میں سفر کو ترجیح دیں۔
ترجمان نے مزید بتایا کہ قومی شاہراہوں پر لاہور، مانگا منڈی، پھول نگر اور پتوکی سمیت رینالہ خورد، اوکاڑہ، ساہیوال، اقبال نگر، کسوال اور میاں چنوں میں شدید دھند چھائی ہوئی ہے جہاں حد نگاہ 0 سے 100 میٹر تک ریکارڈ کی جا رہی ہے، شہری رہنمائی اور کسی بھی مدد کیلئے ہیلپ لائن 130 پر رابطہ کیا جا سکتا ہے۔
