انجلینا جولی کا فلسطینی پناہ گزینوں کیلئے رفح کراسنگ کا دورہ
قاہرہ: (دنیا نیوز) ہالی وڈ کی معروف اداکارہ انجلینا جولی نے غزہ میں داخلے کے لیے رفح کراسنگ کے مصری حصے کا دورہ کیا اور ہلال احمر کے ارکان اور انسانی امداد لے جانے والے ٹرک ڈرائیورز سے ملاقات کی۔
اداکارہ اور اقوامِ متحدہ کے پناہ گزین ادارے کی سابق خصوصی نمائندہ نے یہ دورہ مصر منتقل کیے گئے زخمی فلسطینیوں کی حالت دیکھنے اور تباہ حال علاقے میں امدادی سامان کی ترسیل کا جائزہ لینے کے لیے کیا، مصر نے رفح کراسنگ کے ذریعے غزہ سے آنے والے متعدد پناہ گزینوں کو قبول کیا ہے۔
انجلینا جولی کے ہمراہ امریکی محکمہ خارجہ کا ایک نمائندہ، شمالی سینا کے گورنر اور مصر کے وزیرِ امیگریشن بھی موجود تھے، جو بین الاقوامی انسانی امداد کی کوششوں میں حصہ لینے اور امداد کی ترسیل کو یقینی بنانے کے لیے مصری اور امریکی اقدامات کی حمایت کے لیے آئے تھے۔
اداکارہ انجلینا جولی انسانی ہمدردری کی بنیاد پر سرگرمیوں کے لیے جانی جاتی ہیں اور ماضی میں دنیا بھر میں اس طرح کی سرگرمیاں ادا کر چکی ہیں۔
غزہ کے شہری اسرائیل کی پٹی پر جاری دو سالہ جنگ کے نتیجے میں تباہ کن حالات کا سامنا کر رہے ہیں، جس کے باعث 70 ہزار سے زائد افراد ہلاک ہو چکے ہیں، جن میں اکثریت عام شہریوں کی ہے جبکہ بنیادی ڈھانچہ بھی بری طرح تباہ ہو چکا ہے۔
